Reds-ah Kerkez

Premier League champion Liverpool an tal 'na' tlat - Bournemouth aṭangin left back Milos Kerkez an la lut dawn a, he thuziak i chhiar meuh chuan an in la lut fel tawh hial mai thei.

Kum 21 mi full back manah hian Reds leh Cherries an inrem tawh a, pound maktaduai 40 man tur a ni. Kerkez-a kum zat ngaihtuahin, Reds hian tun hun bakah hma hun an thlir tel tih a chiang.

Kerkez hian Hungarian club Gyor aṭangin a professional zinkawng a zawh ṭan a, kum 2021 khan AC Milan zawm mah se, Serie A club tan hian a inlan miah lo. January 2022-ah Eredivisie club AZ Alkmaar a zawm a, kum 2023 khan Bournemouth a pan.

Cherries tan season hnih a khelh hnuah Reds a zawm dawn ta. Season hman zawh takah khan Premier League Fan Team of the Season leh The Athletic Team of the Season-ah a lang phak.

Hetihlai hian Kerkez an lak dawn takah chuan Andy Robertson dinhmun a chiang lo. Scottish fullback hi Liverpool chuan chelh an duh a, Kostas Tsimikas zawk chu chhuak mah se, pawi an ti lo.

Mahse, Robertson hi Atletico Madrid lamin an duh a, inkhelh tam duha chhuah a duh a nih pawhin Reds hian an hrethiam dawn niin an sawi.

Hetihlai hian Bournemouth hian Kerkez thlakna tur pawh an la fel der tawh a, Rennes aṭangin Adrien Truffert an la lut.

Kum 23 mi left back manah hian £11.4mtd an inseng a, a khelh ṭhat dan a zirin £3mtd an pek belh ang a, an hralh a nih chuan Ligue 1 club Rennes hian 10% an chang ve bawk ang.