Ayush an hnawt chhuak - India an tlawm!

AFC Under-23 Asian Cup 2026 Qualifiers inbuatsaih nana an inkhel hmasa zawkah India an tlawm - Blue Colts hian Nilaini zan khan Tajikistan chu friendly match an khelhpui a, 3-2 in an tlawm.

India U23 tan Ayush Chhetri leh Lalrinliana Hnamte ten inkhel bul an ṭan a, Ayush hi second half ṭan aṭanga minute 10-na lekah hnawhchhuah a ni - Dinthar tlangval hian a yellow card pahnihna a hmu.

FC Goa midfielder hnawhchhuah a nih lai hian India hian 1-0 in hma an hruai a, Suhail Ahmad Bhat chuan goal hmahruai a khung - mahse, player kim loa India an khelh hnu lawkah Ansor Khabibov chuan si phurh a sut a, 1-1 a ni.

Tlem zawk ni chungin India an khel ṭha a, minute 64-naa luhtir Lalremtluanga Fanai a rawn khel ṭha viau bawk. India tan minute 85-naah Parthib Gogoi chuan goal a khung belh zui a, India hi chak mai tura beisei an ni hman.

Beisei ang vek erawhin thil a kal lo. Tajikistan hian hun pek belhah Muhammadiqbol Davlatov leh Muhammadali Azizboev te hmangin an khung a, 3-2 in an chak daih!

Blue Colts hian June 21, Inrinni Zan dar 8:30-ah friendly match an khel zui leh dawn a, Kyrgyz Republic nen an inkhel ang.