Saudi Pro League lam ka hawi thei lo - Sarri

Maurizio Sarri chuan football a hmangaih avangin Saudi Pro League lam a hawi thei lo tih a sawi. Italian manager hian tun hnai khan Lazio team enkawl turin contract a ziak thar a ni.

Italian chanchinbu ten an tarlan dan chuan, season khata euro maktaduai 18 hlawh turin Sarri hian sawmna a hmu. Mahse, Saudi Pro League lama sawmna a hmuh hmun thuma ṭhena hmun khat pawh tling lo hlawh a Lazio enkawl a thlang zawk.

Chelsea manager pawh ni tawh Sarri chuan, "Tun hma lama ka sawi tawh kha a la danglam lo, kei chuan sum ni loin ka thinlung duhzawng ka zui zawk ang. Hmangaihna nen football chamchilh ka duh a, tun dinhmunah chuan hausak chakna in min la hneh thei lo a ni," a ti.

Tun hnai khan Inter Milan nena inṭhen hnu lawkah Simone Inzaghi chuan Saudi lam a pan. Italy coach aṭanga bang hlim Luciano Spalletti pawhin Saudi lam aṭangin sum tam tak hlawh tura sawmna a dawng niin an sawi bawk.

Kum 66 mi Sarri hian Serie A club Empoli hnuah Napoli, Chelsea, Juventus leh Lazio te a enkawl leh tawh a, season thar atan inbuatsaihna an nei chho mek.