Tiafoe hnehtu Evans

Queen’s Club Championship khelh laiah Dan Evans chuan seeded pasarihna Frances Tiafoe chu 7-5, 6-2 a hnehin last 16 a inhlangkai a, rinkai lo zawkin hnehna a chang tiin a sawi ngam.

Evans hi kum 35 mi a ni tawh a, world ranking lamah pawh 199-na daih a ni. Tournament buatsaihtu lamin duhsak takin wildcard an pe a, kum 2023 hnu lamah a vawi khat nan ranking sang zual 20 china mi a hneh.

British tlangval Evans chuan, "World number 20 chin a ni tih pawh ka hre lo, player ṭha tak a ni tih chu ka hriat chin a ni. Nuamti takin tennis ka khel tawp mai a, a tawpah result ṭha ka nei chhunzawm bawk," tiin a sawi.

Inkhel dangah seeded palina Holger Rune chuan Christopher O’Connell chu 6-3, 6-4 in a hneh. Denmark tlangval Rune hian a vawi khat nan grass court-ah nomawi chawi a beisei mek.

Roberto Bautista Agut pawhin a khingpui in match point a hmuh tawh chu a pawtthla - Nuno Borges lakah a dinhmun a hniam hman hle, set hnihna bikah phei chuan 4-1 in a hniam hman, mahse a tawpah 6-7(6), 7-5, 6-4 in a chak.

Kar hmasa khan hmeichhe lamin Queen’s Club Championship hi an khel tawh a, tun kar chhungin mipa lamin an khel ve leh thung. June 30 aṭangin grass court inelna lian ber Wimbledon an khel leh dawn a ni.