Hockey aṭangin Olympic a hnai - Sports Minister

Mizoram sports minister Lalnghinglova Hmar chuan Mizote tan hockey kaltlanga Olympic-a inlanna chance a san thu a sawi a, "Hockey-ah theihna kan nei tih a chiang a, India team-a kan lan theih chuan Olympic khel thei kan nihna a hnai nghal hle," a ti.

Tetea Hmar hian nimin khan a office-ah 15th Hockey India Senior Women National Championship 2025-a bronze medal la Mizoram team-te lawmpuina hun a hmang a, hockey player-te chu India tana inlan phak tum turin a fuih a ni.

Sports minister chuan, "Kum 2036 Olympic atan India chuan hmathlir neiin, inbuatsaihna a kalpui mek a, Mizoram pawhin infiammi a tam thei ang ber thawh ve kan duh - hockey hi Olympian kan neih theihna tura kawng kan neih hnai a ni," a ti.

Mizoram hmeichhe hockey team-te hian March 1-12, 2025 khan India rama hmeichhe hockey inelna sang ber inelna an hmachhawn a, semifinal-ah champion zui ta Jharkhand chu an ngam lo. Mahse, pathumna inchuhna inkhelah Maharashtra hnehin, bronze an lo hawn.

Sports minister chuan, "Tun hnaia kan player neih langsarte hi Thenzawl Hockey Academy aṭanga chhuak an ni zel, academy pakhat aṭanga national leh international player tuna kan neih ang zat an chhuak thei a nih chuan, a inkhel ṭhinte hi tam se chuan kan thleng sang lehzual ang," a ti a, hockey chu mipui zingah tihlar thar leh a ṭula a hriat thu a sawi.

Tetea Hmar chuan an duh anga hmaa Mizo hockey player-te lawmpuina hun an hmang thei lo chu pawi a tih thu sawiin, "National inelna liana medal late lawmpuina hun han hmanpui nghal che u kan duh laiin, player-te lo haw a rual thei si lo a, a rem thei ta lo," a ti.

Sports Minister chuan Mizoramah hockey khel tam lo mah se, hlawhtlinna neite thlirin, Mizoten theihna kan neih sanna tak nia a hriat thu a sawi a, mumal taka inchher theihna tur academy leh hmunhma dangte pawh ngaihtuaha hmalak mek a nih thu a sawi.