Palinaah Fritz a awm

Mipa tennis thuneitu sang Association of Tennis Professionals (ATP) chuan world ranking thar a ti chhuak a, tun hnaia Stuttgart Open champion Taylor Fritz chu palinaah a awm.

American tlangval Fritz hian Alexander Zverev hnehin nomawi a chawi a, ranking lamah pawh player pathum kal kanin a dinhmun a siamṭha, grass court inelna lian Wimbledon khelh hun a hnaih tawh avangin atan chanchin lawmawm a ni ang.

French Open-ah khan Fritz hi hneh nei loina tla a, pasarihnaah a tlahniam zui. Grass court season an hmang ṭan a, result a neih ṭhat leh tak avangin a ranking pawh a sang chho ve leh nghal a ni.

A sang lam pathum - Jannik Sinner, Carlos Alcaraz leh Zverev te chu an dinhmun a inthlak lo a, an san fal deuh avangin player dang tan umphak mai theih an ni lo. All England Club-ah pawh seeded sang an ni ang.

Novak Djokovic chu number 5 a ni chhunzawm. Serbian star hian a vanglai angin tournament a khel tam tawh lo, a khelh hoah pawh result a nei ṭha tawk lo bawk. Mahse, player hlauhawm a la ni reng a, champion chiah lo mah se a la thlen san fo avangin a ranking hi a chhe lem lo.

June 30 aṭangin Wimbledon an khel ṭan leh dawn, tun season chhung atana Grand Slam pathumna a ni ang. Tennis ngainatu te chuan All England Club lam an hawi leh dawn, champion lai chu Carlos Alcaraz a ni - Spanish star hian French Open nomawi a kawl mek bawk a ni.