Football mawina pho chhuaktu Pablo Aimar

"Naupang ka nih laia ka en nasat ber chu Pablo Aimar a ni," tiin Lionel Messi chuan a sawi a, amah ang thoa Argentine player hi a player ngaihsan ber a nih ṭhin thu a sawi. 

Messi-te huangah Aimar hi engtikah mah dah ni dawn lo mah se hmuhnawm ti taka football min lo entir tawhtu kha a ni a, amah ang taka inkhelh thiam chakin Argentine naupang tam tak chuan ngaisangin an thlir ṭhin. 

Kum 2000 chhoa La Liga en ṭhinte chuan Pablo Aimar thiam bikzia an hai lo ang tih a chiang a, mahse hliam avanga a nih tur ang a ni phak lo erawh Argentine mipui mai ni lo football ngainatu, a inkhel en tawh phawt chuan ui takin an la sawi reng a nih hi. 

Diego Maradona meuhin, "Ka hmun ruak luahtu tur," tiin sang takah dah mah se Aimar hian Maradona pheikhawk hnutchhiah lian tak chu a inthawlh zo lo a, amah ngaisanga thlirtu Messi zawk chu Maradona-te nen khaikhin an ni ta. 

"In aṭanga awm bo a, inkhel reng tur chuan i la naupang lutuk. Lehkha zir rawh, " tiin Ricardo Aimar chuan a fapa Pablo Aimar chu a zilh mawlh mawlh a, lungtum bula thu ṭha hrilh ai pawhin a hlawk lo zawk tih reng reng a hre lo. 

Ricardo hi pa thawkrim, taima leh mi dik niin an sawi ṭhin a, heng zawng zawngah hian a fapain a chhun hle - a chhun lohna pakhat erawh exam-naa mark a ngaih pawimawh em em laiin Pablo tan erawh percentage tih velin rilru a luah lo a, a pawimawh ber chu football-a ni. 

Pablo hian an khaw club  Estudiantes de Río Cuarto tan a khel a, kar khat chhungin club academy-ah vawi thum training a nei ṭhin. Argentine club ṭha River Plate-in an hmu fuh a, club zawm turin an sawm - mahse, a pa chuan lehkha zir turin a duh zawk. 

River Plate legend leh manager Daniel Passarella hnenah Pablo a zual ko vat a, a pa hnenah River Plate academy zawm phalsak tura dil turin a ngen. Ricardo tan tih theih a awm lo, a fapa chu a tuina lama kal turin thuneihna a pe. 

Pablo Aimar-a'n lehkha zir aia football a dah pawimawh zawk chungin zirna lamah pawh a thiam thei pawl a ni reng a, doctor zir turin hun ṭha a nei - mahse, a pa duh loh dan bawkin thutlukna a siam a, football a thlang. 

Ricardo-a'n a fapa chu kawr chung var ha a, a nghawnga 'stethoscope' awrh kual tura a beisei laiin Pablo duhthusam erawh mipui tam tak hmaa football nena 'lam' dun chu a ni a, damlo te tihdam chu hna ropui tak ni mah se 'ennawm' en chaka tuihalte tana ennawm phochhuah chu a thlang zawk. 

Kawngpui dunga a ṭhiante nena an inkhel lai a hmuh fuh avanga Estudiantes youth coach Alfie Mercado-a'n a team zawm tura a thlan naupang hian kum 16 mi lek a nihin River Plate tan a match hmasa ber a khel a, thawnthu chu ziah ṭan a ni. 

Colón de Santa Fe laka a match hmasa ber a khelh ṭumin River Plate fan-te chuan hmuhnawm ti takin Aimar an en a, a che vel aṭang chuan football thiam bik player an kawl mek tihah an chiang hle. 

River Plate-ah Aimar a tlangnel chho a, a che vel en tur ringawta ticket lei pawh thil man hla a tling. Colombian forward hmuhnawm Juan Pablo Ángel leh Chilean striker Marcelo Salas-te tan chuan ani thawhpui chu duhthusam a ni a, an goal khung tur supply tuah a ṭang. 

Argentine club tan a khelh hnua Lazio leh Juventus tan pawha lo khel tawh Salas chuan, "Aimar hi chu a danglam bik a ni. A laia ka awm chuan min rawn zawng hmu vat a, chu chu a tih dan phung reng a ni," a ti. 

River Plate-a season li a khelh meuh chuan Argentine player hi khawvelin a hmelhriat tawh a, hetihlai hian  Maradona chuan a hmun ruak luahtu tur a nih thu a lo sawi ve mek bawk - European club-te an awm hle hle thei tawh lo. 

Aimar chuan, "England, Spain leh Italy aṭangin sawmna ka hmu a, phur tak ka ni. Mahse, a tawpah erawh awlsam taka thutlukna siamin Valencia ka pan a ni," a ti a, hetihlai hian River Plate tan match 82 khel hmanin goal 21 a khung a, vawi 28 assist a nei!

January 2001-ah Aimar-a'n Valencia a pan a, hetihlaia a man zat hi euro maktaduai 24 niin Los Che chanchina player manto ber record a siam - Valencia hi Héctor Cúper enkawlna hnuaiah khelin  Gaizka Mendieta, Vicente, Zlatko Zahovic, Rubén Baraja, Adrien Ilie leh John Carew-te an awm sa. 

Thlasik transfer-a zawm ni mah se player thiam bik Aimar-a'n hmun pawimawh a chang nghal vat a, attacking mdifield-ah dahin a duh ang taka tal turin zalenna pek a ni - hei hi Cuper-a thutlukna fuh ber tih hialin an sawi ṭhin!

Barcelona legend Johan Cruyff meuh pawh Aimar-a thiamna hian a 'hneh' a, fakna thu a chhak chhuak hial. Catalan club pawhin an club legend meuhin a fak chu an thlithlai vak a, Nou Camp-ah lakluh an tum. 

Mahse, 'El Mago' (The Magician) tia fan-ten hming lem an pek Aimar hian nuamti taka khelh chu a duh ber a ni a, a season hmasa berah Champions League final lutin Bayern Munich ngam lo mah se Valencia-a cham chhunzawm a thlang. 

Cuper-a'n Inter Milan lam panin Valencia a chhuahsan a, Tenerife manager Rafael Benítez chu Los Che manager thar a ni. Benitez-a'n tlarhnunga Real Madrid talbuaina a hmu a, khelmual pawn lama Barcelona buaina a hai lo - an tan La Liga nomawi chawi theihna kawng a inhawng tih a hria.

Benitez hian 4-2-3-1 formation chu Valencia-ah hian a hmang ṭangkai a, tlarhmaah Spanish striker Mista chu maltlat tir niin a hnungah Aimar chu a puitu turin dah a ni a, mahse Cuper ang lo takin zalenna famkim erawh pek a ni lo. 

Spanish manager Benitez-a'n tlarhnung chu ngaih pawimawhah a neih avangin Aimar pawh hi a ṭul huna tawlh leta tlarhnung pui turin tih a ni a, a khelh ṭhat ṭhin em avangin Valencia game 'cheimawitu' tiin an sawi. 

Valencia-a a season hmasa berah Benitez-a'n league nomawi a chawi nghal a, kum 31 hnua Spanish club-in league nomawi an chawi lehna hmasa ber a ni. 

Benitez-a hnuaia an season hnihnaah Valencia-in beisei an phak lo. La Liga-ah pangana an ni phak ṭawk a, Champions League-ah quarterfinal bak an thleng lo bawk - hetihrual hian Aimar erawh a khel ṭha reng a, Champions League bikah phei chuan assist vawi nga neiin AC Milan player Rui Costa nen assist ngah ber an ni. 

Spanish coach-in a beisei anga season an hman loh avangin an khelh dan an thlak a ngai tih a hria a, a season thumnaah a defensive game thlak danglamin goal nawr a uar thar a, league nomawi an chawi bakah UEFA Cup-ah an champion.

Mahse, Valencia tana an season duhawm ber hi Aimar leh Valencia tan tawpna inṭanna a lo ni reng si - he season-ah hian hliam vangin Aimar-a'n beisei a phak lo a, a thiamna hai rual ni lo mah se season dang nen khaikhin chi a ni lo. 

Benitez leh Valencia director of football  Jesús García Pitarch an inhmu thiam lo a, Benitez hian Liverpool a pan - Valencia-in a tisual a, a tuartu zingah Aimar a tel.  Coach Claudio Ranieri -a'n Aimar a ring tawk lo a, a inhliam reng bawk nen Argentine player thiamna kan hmu khat sawt. 

Season khat pawh a tluan hmain Ranieri ban a ni a, coach lailawk Antonio López (tuna ATK coach) chuan Aimar chu bul ṭantuah a hruai kir. Mahse, a inhliam reng a, inrintawkna a hloh a, kan hmuh ṭhin Aimar kan hmu tawh lo. 

Mahse, Aimar hi Rafa Benitez-a'n a la ngaizawng reng a, 2006 khan Liverpool-ah hruai a tum. Mahse, Aimar a huaisen tawk lo - top club-a khel zel turin a tlin tawk tawh loah a inngai a, mak tak maiin Spanish club vantlang Real Zaragoza lam a pan. 

Zaragoza-ah hian Gabriel Milito, Diego Milito, Roberto Ayala leh Gerard Piqué-te an awm sa a, a season hmasa berah parukna an ni - Milito tan chuan Aimar lo lut chu chanchin lawmawm a ni a, league-a goal 23-a khung theih nan Aimar a thawh hlawk takzet. 

Aimar hian Zaragoza-a a season hmasa berah hian league match 31 khelin goal nga a khung a, assist vawi 11 a nei. Víctor Fernández enlawlna hnuaiah Aimar a zalen thar a, a theihna tak tak a lang leh dawn ta niah a fan-ten ngaiin an lawm hman hle. 

Aimar-a fan-te  beisei angin thil a kal lo. Sum lamah Zaragoza an talbuai a, player pawimawh an chan zui - league-ah 18-na an ni a, an relegate. Aimar-a'n khaw dang a hawi vat a, sawmna tam tak karah chona thar hmachhawn tumin Benfica a pan. 

Benfica-ah hian Óscar Cardozo, Nuno Gomes, Ángel Di María leh José Antonio Reyes-te nen an khel ho a, season nga a cham chhungin league nomawi vawi khat a chawi a, Portuguese League Cup-ah vawi li an champion. 

Aimar hian 2009-10 season hi Benfica-a a hun duhawm ber tih ngam a ni - Primeira Liga leh Taça da Liga nomawi a chawi a, tlarhmaa Javier  Saviola leh Di María-te nena an han tal vel chu hmuhnawm a tling. 

Mahse, a kum a tam a, hliamin a 'duhsak' zeuh zeuh bawk nen 2014-a herchhuah meuh chuan Aimar-a'n a hlawh tamna tur Malaysian club Johor Darul Ta'zim panin season khat a khel a, 2015-ah River Plate-ah kirin a bul ṭanna club-ah bawk hian a chawl. 

Primera División: 1997 Apertura, 1999 Apertura, 2000 Clausura

Supercopa Sudamericana: 1997

Recopa Sudamericana: Runner-up 1997

La Liga: 2001–02, 2003–04

UEFA Cup: 2003–04

UEFA Super Cup: 2004

Supercopa de España: Runner-up 2002, 2004

UEFA Champions League: Runner-up 2000–01

Primeira Liga: 2009–10

Taça da Liga: 2008–09, 2009–10, 2010–11, 2011–12

UEFA Europa League: Runner-up 2012–13

Taça de Portugal: Runner-up 2012–13

Supertaça Cândido de Oliveira: Runner-up 2010

Malaysian Super League: 2014

South American Under-17 Football Championship: Runner-up 1995

FIFA U-17 World Cup: Third-place 1995

South American Youth Championship: 1997, 1999

FIFA U-20 World Cup: 1997

FIFA Confederations Cup: Runner-up 2005

Copa América: Runner-up 2007

FIFA U-20 World Cup: Bronze Ball 1997

South American Team of the Year: 1999, 2000

UEFA Champions League: Top Assists 2002–03

Trofeo EFE: 2005–06

Cosme Damião Awards – Footballer of the Year: 2011