Milner a la chawl dawn lo

James Milner chuan inkhelh a la chawlhsan mai dawn lo - English player hian Brighton & Hove Albion tan season khat daih contract a ziah belh a, an inremna hun a hman zawh chuan kum 40 a tling tawh ang.

Milner hian kum 2023 khan Liverpool a chhuahsan a, chumi hnuah Seagulls a zawm - midfielder ni mah se hmun hrang hrangah khelh kual tir a ni fo a, tawnhriat a ngah tawh bawk avangin a la ṭangkai hle.

Nakkum January 4-ah Milner hian kum 40 a tling dawn - Premier League player (goalkeeper chhiar tel lo in) zinga inkhel thei upa ber ni tur erawhin season thar bakah season dang vawi khat a la inkhelh leh a ngai dawn!

England forward Teddy Sheringham khan kum 40 leh ni 272 mi ni chungin West Ham tan a khel a, EPL outfield player upa ber a ni - Milner tan record hmasa hi khum theih a ni a, chutihrualin hmabak erawh a la thui angreng hle.

Season hmasa pawh khan Milner hian Brighton tan match li chauh a khel - England tana match 61 kheltu hi season tharah pawh a hmel kan hmuh tam a rinawm loh a, mahse player naupang zawk tan zirtur tam tak a siamsak thei ang.

Leeds United aṭanga football zinkawng zawh ṭantu niin, a vanglai chuan Newcastle United, Aston Villa, Manchester City leh Liverpool tan pawh a lo khel tawh ṭhin a ni.