Thawhchhuah inbeisei Sinner

Mipa tennis world number 1 Jannik Sinner chuan French Open khelh zawh taka Carlos Alcaraz a hneh lo chuan na takin a nghawng tih a sawi a, tun kara khelh tur Halle Open chu thawh chhuah leh theihna remchang atan hman a tum.

Italian tkangval Sinner hi player ṭha bik a ni, chutihrualin amah aia kum naupang leh ranking hniam zawk Alcaraz hi a ngam hleithei lo. Paris khawpuiah pawh set hnih la hmasa mah se a tawpah chuan a chak lo zawk a ni.

Sinner chuan, "A nihna takah chuan final-a ka chak loh hnu kha chuan zan muthilh harsa tih chang te ka nei a, eng lai tak kha nge ka tih dik tawk loh tih ka ngaihtuah ṭhin, insiamṭhat ka ngaihna lai ka ngaihtuah nasa.

"Hun kal tawh avanga indawm kun reng erawh a ṭul ber lo. Tunah chuan Halle Open kan khel dawn, boruak nuam leh danglam a ni tawh dawn a, result ṭha ka neih chuan ka rilru pawh a ṭha zawngin a nghawng leh ngei ang," tiin a sawi.

Tun kar chhung hian grass court-ah tennis tournament tenau ṭhenkhat an khel leh ang a, heng inelna te hi Wimbledon inbuatsaihna a ni ang. Grass court inelna lian ber hi June 30 aṭanga July 13 chhung All England Club-ah an khel chhunzawm ang.