Pogba leh Monaco an inhnaih

Hremna a hman zawh hnuah Paul Pogba chuan football khelh leh ngei a tum a, tunah hian Ligue 1 club AS Monaco nen an inbe mek - inremna pawh an nei hnai niin khawthlang chanchinbu te chuan an tarlang.

Kum 32 mi Pogba hian damdawi hman phal loh a hmang tih man chhuah a ni a, hun rei tak chhung hram a nih avangin a inkhel thei lo, tunah chuan mimal training a nei ve leh thei tawh.

France international midfielder hi a tirah chuan kum li chhung atan hrem a ni a, mahse a hnuah thla 18 chhung atan tih tawisak a ni. Juventus nen inremsiam tawnna in thawhhona an ti tawp a, kumin March aṭang khan a duh zawng club nen an inbe thei.

A kum ngaihtuah chuan Pogba hian hma hun a la nei, mahse eng ang takin nge a rawn kir theih dawn sawi lawk a harsa. Club tam takin an lalut duh ang tih a chiang a, chutihrualin ama tana ṭha tur erawh a thlan thiam ve a pawimawh ang.

BBC tarlan dan chuan Pogba leh Monaco te hi an inhnaih tawh hle a, kum hnih chhung atan an inrem dawn niin a ziak. Ligue 1 club hian tun aṭanga hun rei lote hnuah an lalut dawn niin a lang, Pogba tan pawh anmahni ram ngei aṭanga bul ṭan thar leh chu a fuhin a rinawm.