Thunder chakin Pacers an nihrual

NBA Finals 2025 khelh laiah team pahnih an inkhel tawk hle - Inrinni zing khan Game 4 khelh niin Oklahoma City Thunder chuan an hniam zawk hnuah Indiana Pacers chu 111-104 in an hneh.

Best of seven series hmangin chak zawk zawn tur a ni a, vawi li an intawn tawh chinah Thunder leh Pacers hi 2-2 in an inhnehtawk mek. June 15, Thawhlehni zing dar 6:00 hian Thunder mualah game 5 an khel chhunzawm leh ang.

Gainbridge Fieldhouse, Indianapolis-a inkhelah Thunder hi an hniam zawk deuh reng, quarter hnuhnung ber an khelh ṭan dawnah pawh point sarihin an hniam zawk; mahse quarter lina bikah hian 31-17 a sang zawkin an chak a, an kalfai lai phei chuan 12-1 a kaltluang lai te an nei hial a ni.

Thunder chak theih nana point 35 hmutu Shai Gilgeous-Alexander chuan, "Tun ṭumah khan chak lo ni ila chuan kan dinhmun a chhe dawn hle tih kan hrechiang a, quarter hnuhnung ber kan khelh dawn khan thawh chhuah leh beiseina kha kan la nei sang.

"Tunah chuan keimahni mual lamah kan khel ve leh thung tawh dawn, result ṭha kan nei zui a nih chuan Pacers muala kan let leh hunah pawh inrintawkna kan neih theih phah ang," tiin a sawi.

Thunder khelmualah vawi khat an inkhel ang a, chumi hnuah Pacers lamin match an thleng ve leh ang; game 6 thlenga chak zawk an awm loh chuan Thunder khelmualah a hmawr an bawk thung ang.

Thunder coach Mark Daigneaul-a'n a player ṭha Gilgeous-Alexander hi quarter thumna an khelh laiin hahchawlhna hun a pe zeuh a, quarter hnuhnung berah NBA Most Valuable Player (MVP) hian ṭha takin a khelh theih phah nia ngaih a ni.

Hun tawp hma minute li chauh a la awm lai khan Pacers hian 101-97 in hma an la hruai. Mahse, hun pawimawh laiah Gilgeous-Alexander an ngam lo! Ani hian Thunder lam point hnuhnung 16 zinga 15 tehmeuh chu a nei a, free-throw vawi 10 a vawm chu a lut vek.

Gilgeous-Alexander bakah hian Jalen Williams chuan point 27 a nei a, rebound vawi sarih a la bawk - point 20 neitu Alex Caruso chu Thunder an chak theih nana player langsar a ni bawk a, game 5 an khelh leh hunah pawh an hmachhuan tur an ni ang.

Pacers thiampuipa Pascal Siakam-a'n point 20 a neih a, ani bakah hian Tyrese Haliburton chuan point 18 a nei bawk. Siakam leh Haliburton te chet dan hi chak nan a tawk zo lo a, thlawptu an nei ṭha tawk lo bawk.

Cameroonian forward Siakam chuan, "A tawp kan khar ṭha lo kha a pawi. Awlsam leh harsa lo angreng taka point hmuh theihna tur kha kan hlah tlat ṭhin a, anni lamin an lut tlat ṭhin kha kan danglamna lai chu a ni.

"Inelna hi a la zo lo a, match hmasa zawkah pawh kan chak thei a ni tih kan lantir tawh. Chuvangin, Paycom Center kan tlawh hunah pawh beiseina kan nei thei ang," tiin khualmualah hnehna chan theih ngei a beisei thu a sawi.