Atletico-in Robertson an duh

Liverpool-a dinhmun nghet lo nia sawi, Jurgen Klopp-a hnuaia left back hmuhnawm bik ni ṭhin Andy Robertson-a'n Liverpool a chhuahsan mai thei - Atletico Madrid chuan Reds player hi an rim mek.

Tun nipui transfer-a chet nat tum tak Liverpool hian Bournemouth aṭangin left back Milos Kerkez chu lakluh tumin an hel mek a, Hungary international hi pound maktaduai 45-50 inkar vela lakluh theih an inbeisei.

Kum 21 mi Kerkez hian Reds a pan a nih chuan Robertson-a tan inlanna chance a tlem sawt dawn tihna a ni a, a tan chhuah a finthlak mai thei - tun hnai khan a hma hun a la ngaihtuah hman loh thu a sawi thung.

Robertson chuan, "Ka hma hun ka la ngaihtuah vak lo a, season rei tak kan hman hnuah hahdam taka hun hman phawt hi ka duh ber chu a ni," a ti a, Scotland captain hian chawlh a hman zawh meuh chuan Spain lam a hawi ṭan a ngai tawh mai thei.

Hetihlai hian Liverpool lam chuan Robertson hi cham turin an duh a, tun dinhmuna a thachhang dawltu Kostas Tsimikas hi chhuak mah se, an pawi ti lo zawk - Robertson hi a cham chuan, first choice chiang a ni dawn lo a, Kerkez nen hmun an inchuh a ngai ang.

Robertson hian, "Ka kum hi chu ka thlak danglam theih a ni lo a, mahse, team tan ka la ṭangkai theiin ka hria. Kum tam tak la inkhel theiah ka inngai - tun dinhmunah chuan ka taksa lamah buaina ka nei lo.

"Kum 33 emaw 34 emaw ka tlin huna ka awm dan tur chu ka sawi lawk thei lo a, mahse, tunah hian kum 31 ni mek chungin ka la in 'fit' ṭha khawp mai," a ti a, Reds tan inkhel tlakah a la inngai.

Robertson hian season hman zawh takah khan league match 38 aṭangin 33 a la khel a, match 33-ah hian bul a ṭan vek.