Spurs-in Tel an la nghet

Tottenham Hotspur chuan loan-a an hawh lai, French forward Mathys Tel chu Bayern Munich aṭangin a nghetin an la lut a, kum 20 mi manah hian pound maktaduai 30 an inseng.

Tel hian June thla tawp thleng Spurs-a loan-a khel turin contract a nei a, a loan hun a zawh ve leh, contract thar ziakin, London club-ah hian kum ruk a cham ang.

European Under-21 Championship khel tura France squad-a awm mek Tel hian January-ah khan Spurs hi loan-in a zawm a, a tirah chuan Bayern nen hian a ngheta an la lut dawn a nih chuan £45mtd-a la lut turin an inrem.

Mahse, London club-in German champion an dawn a, an tifuh - £15mtd ngawta an inremna hmasa aia hniamin Tel an la lut thei dawn.

French club Rennes aṭanga a professional zinkawng zawh ṭantu Tel hian season hman zawh takah khan Spurs tan match 20 a khel hman a, goal thum khungin, assist vawi khat a nei.

Mahse, Europa League final-a Manchester United nen an inkhelh ṭumin bench lamah a awm tluan thung. Spurs hi coach thar Thomas Frank-a hnuaiah an khel dawn a, Brentford forward Bryan Mbeumo pawh an rim mek.