Republic Vengin champion an lawm ropui

LBS Suzuki 22nd Inter Branch YMA Football 2025-ah Republic Veng an champion a; June 11, Inrinni khan Republic Veng Branch YMA chuan Community Hall-ah sial pahnih talhin ropui takin champion an lawm.

Champion lawmnaah hian sports minister Lalnghinglova Hmar chu khuallian a ni a, MP (Rajya Sabha) K. Vanlalvena chu uaptu niin agriculture minister PC Vanlalruata, Ward No. XVII corporator David Zohmangaiha leh CYMA president Lalhmachhuana ten an telpui bawk.

Republic Vengin kum 20 hnua CYMA Football-a an champion hi an ngaihlu a, veng pumin ruai an ṭheh a, mi 3000 vel zetin ruai an ṭheh. Bialtu MLA C. Lalsawivunga leh MP K. Vanlalvena ten sial pakhat ve ve an thawh a, nomawi hmangin YMA Day lawmna hlimawm bik an hmang.

Hnehna hlado

Mizo takin chawimawina hun ṭan a ni a, MC&DC buatsaihin president R. Liandawla'n hlado a chham a, silai kapin chhunzawmin a ropui hle.

Champion e, Republic veng kan Champion e...

Thangchhuah e, Zofa World Cup Football-ah ngei...

Zai vawrin hlimin lam ang, Sir Sanga'n min chawisang e...

Sir Sanga'n min chawisang e,

Zai vawrin hlimin lam ang, Champion Lawm kan ni ngai e...

Chawimawina

CYMA Football 2025-a champion lawmman hi nomawi leh cheng nuai khat a ni a, veng puma lawmna tham a tling lo. Republic Veng Branch YMA-in an sum fai dawn bakah branch sum aṭanga belhin player leh coaching staff hnenah chawimawina an hlan.

Kum 2005 khan Republic Veng hi CYMA Football-ah a vawi khat nan an champion a, kum 20 liam taa champion team hian tun ṭuma champion-te hi chawimawina an hlan a. Chutihrualin champion hmasak ṭuma player pawimawh defender ṭha Lalniliana, Lalremruata (Tawihtea) leh C. Lalthanpuia (Super-a) ten mual an liam tawh thung.

Zan lamah Branch YMA-in Mizo zaithiam lar Vanlalhlana, Youngfella leh Siampuiii Ralte hoin zaih hona hun an buatsaih a, he hunah hian champion team-te chu thangchhuah diar an khim tir leh bawk.

Sanga an chawimawi

Republic Vengin an champion chhan an chiang a, coach Lalsangzuala Hmar vanga champion tih an pawm thlap. Veng mipuiin coach Sanga chanchin sawi an bang lo a, thusawi apiangin champion puitu coach an fak bawk.

Chutihrualin Sanga hi tun hmain CYMA Football a la champion ngai lo a, tun ṭum hi a champion hmasak ber a ni. MPL12-a Saikhamakawn enkawltu tur coach Sanga chuan, "Republic Veng zawng in lo ropui e. In hnen aṭangin zir tur ka va hmu hnem em. Kan inbuatsaih ṭan ni aṭanga a lawmna ni thlenga programme inruahman dan zawng zawngte kha ka lo thlirlet a. Eng kim mai hi a felfai thlap. A bu ang thlapin a kal. Hruaitu in nei ṭha a, in vannei ngei mai," tiin a sawi.