Mizoram Grassroot Badminton League a zo

TATA Trust, NEIDA leh Mizoram Badminton Association (MBA) ṭangkawpin an buatsaih, Mizoram Grassroot Badminton League chu Inrinni khan khelh zawh a ni ta.

Mizoram Badminton Centre, Zuangtuiah inelna hi khar niin, category hrang hrang 11-ah inelna neih a ni a, badminton grassroot centre ṭha leh coach ṭha chawimawina semchhuah nghal a ni bawk.

Badminton-ah hian grassroot centre 25 ngawt Mizoram hmun hrang hrangah kalpui mek a ni a, training nei lai naupang 1095 awmin, mipa 694 leh hmeichhia 401 an ni.

Champhai leh Kolasib-ah elite centre neih a ni a, hetah hian player 27, mipa 14 leh hmeichhia 13 an awm mek a, Regional Competitive Training Centre, Zuangtuiah full time-a training timek mi 25 an awm bawk - hma an la nasa hle.

Mizoramah hian kum 2017-2018 aṭangin kalphung mumal taka badminton training kalpui ṭan a ni a, Mizoramin hma a sawn chak hle - kar hmasa lawk khan Mizo shuttler H. Lalṭhazuala leh C. Lalramsanga te chu Asian Championship-a India aiawh turin an invaw kai thei.

Mizoram Grassroot Badminton League final hi Mizoram sports minister Lalnghinglova Hmar chuan a hmunah a telpui a, Tetea Hmar chuan, "Kum 2036-ah India-in Olympic thlen a tum a, Mizo ṭhalai a tam thei ang ber an tel ve theih nan hma kan la mek. Badminton hi kan hmel lan theihna tak tur niin ka hria," a ti a, MBA, TATA Trust, NEIDA leh Pullela Gopichand Badminton Academy (PGBA) te thawhhona a fak bawk.

Grassroot League final hi Badminton Association of India Vice President leh National Badminton Chief Coach ni bawk, Pullela Gopichand leh TATA Trusts head of sports Neelam Babardesai ten an hmanpui bawk a, Indian legend Gopichand pawhin thu a sawi.

Gopichand chuan, "Kum 1994-ah khan India chuan badminton-a a tawn hniam ber a tawng a, sorkar laipuiin Commonwealth Games-ah pawh player a tir lo. Mahse, hemi hnu hian kalphung mumal taka coaching kalpui ṭan a ni a, kum 30 a ral leh meuh chuan world no.1 ni phak player pathum kan nei a, world championship 15 kan la bawk," a ti.

Indian badminton legend chuan, "Mizoramah pawh kalphung mumal taka kan kal aṭangin thla nga a liam chauh a, Mizoram chuan India team-a tel thei player pahnih kan nei der. India state dang aṭangin hetiang nei thei an awm lo," a ti a, badminton-a Mizoram hmasawnna chu a fak.

Mizoramah hian District Badminton Association 13 an awm a, club 220 inziak lutin, player 9729-in heng club-ah te hian registration an ti a ni.