Republic Vengin champion lawm dawn

Kum 20 hnuah Republic Veng chu Central YMA Football-ah an champion a, vawiin hian Republic Veng Community Hall-ah ruai pui nen YMA Day lawmna neih pahin champion lawmna an nei dawn a, zan lamah champion lawmna zai hona an nei bawk dawn. Champion lawmnaah hian Sports minister Lalnghinglova Hmar chu khuallian a ni ang a, MP K. Vanlalvena chu uaptu a ni thung ang.

Kumin CYMA Football inelnaah team 154 an tel a, team tel tam ber ṭum dawttu a nih bakah veng hlanga khelh a nih avangin inelnain ngaihhlut a hlawh hle. Final-a Republic Veng leh Bethlehem Vengthlang inkhelh ṭum pawhin ruah sur hnuaiah RG Stadium-ah entu sing chuang an pungkhawm.

Republic Veng hian champion turin Zemabawk East (16-0), Chanmari (2-0), Samlukhai (6-0), Khawzawl Zuchhip (5-0), Khawzawl Vengthar (1-0), Sialhawk (2-2, Pen 5-4), Durtlang (3-2, aet) leh Bethlehem Vengthlang (1-1, Pen 6-5) te an hneh. Republic Veng captain Lalnunzira chu best player-a thlan a ni a, goalkeeper RS Lallawmzuala chu best goalkeeper atan thlan a ni bawk.

Champion theihna kawngah F. Lalrinpuia (Valpuia) a la thawh hlawk a, goal sarih khungin an team bikah goal a khung tam ber. Chanmari, Khawzawl Vengthar leh Durtlang an khelh ṭumin goal pawimawh a khung a, Sialhawk an hneh ṭumin penalty a hlawh chhuak bawk. Republic Veng hian champion turin goal 36 an khung a, player 15 ngawtin goal khungin, goal nga chauh an chhuah a, match hmasa pangaah an clean sheet bawk.

Inelna ṭan hmain Republic Veng hi champion rinkai ni lo mah se team enkawl turin coach Lalsangzuala Hmar an la lut a, MPL-a vawi thum nomawi chawi tawh Sanga hian danglamna a thlen. Republic Veng hian March 27, Ningani aṭanga training ṭanin, Pathianni tih loh chu training chawlh an nei lo a, match day chhiar tel loin ni 48 training an nei a, nomawi chawi turin an thawkrim hle.

CYMA Football champion lawmman hi cheng nuai khat chauh a ni a, Republic Veng Branch YMA-in sum faia an lawmman dawn hi a thawk chhuaktu player leh coaching staff-te hnenah an sem ral dawn.

Veng pum ruai ṭheh theih nan MP (Rajya Sabha) K. Vanlalvena leh bialtu MLA C. Lalsawivunga ten cheng nuai khat ve ve an thawh a, Ward No. VII corporator David Zohmangaiha leh Agriculture minister PC Vanlalruata ten cheng sing nga ve ve an thawh bawk.

Veng mipui aṭangin cheng nuai nga chuang an thawh khawm bawk a, khawtlang ṭanrualna zarah ruai pui an ṭheh thei dawn. Republic Veng hi kum 2004-ah Inter Village Football-ah an champion a, kum 2005 khan CYMA Football-ah champion zuiin 'double champion' hi ruaipui nen Republic Veng field-ah an lawm tawh bawk a ni.