Liverpool-in Wirtz an hnaih zel

Premier League champion Liverpool chuan German attacking midfielder Florian Wirtz an hnaih zel a, sports journalist lar Fabrizio Romano phei chuan a thu phungin Reds leh Bayer Leverkusen te chu an inrem tawh ang hialin a tarlang.

Romano hian Leverkusen-in an phut zat euro maktaduai 150 chu Liverpool hian pek an rem ti tawh niin a sawi a, hetihlai hian media rintlak 'The Athletic' chuan Reds hian heti zat zat pek an tum lo niin an sawi thung.

Leverkusen hian Liverpool dawrna hmasa ber leh vawi hnihna chu an lo hnar tawh a, Merseyside club hian kar hmasa khan a vawi thum nan an dawr. Reds hian £114mtd-in Wirtz hi lakluh theih an inbeisei a, a man pek ngei ngei tur erawh £100mtd niin, a bak hi chu a khelh ṭhat dan a zira pek leh tur a ni.

Liverpool sporting director Richard Hughes leh Leverkusen managing director of sport Simon Rolfes te chu Wirtz-a man turah hian an inbe mek a, a khelh ṭhat dan a zira pek tur hi Leverkusen hian an pawm theih leh theih loh an ngaihtuah mek niin BBC chuan a tarlang - a hmawr an bawk hnai tawh. German club hian an player manah hian £126mtd hmuh an inbeisei a, tuna a kal danah erawh heti zat hi Liverpool hian an theh chhuak dawn lo.

Kum 22 mi Wirtz hian season hman zawh takah khan Bayern tan inelna hrang hrangah match 45 khelin, goal 16 a khung a, assist 15 a nei. 2023-24 season khan Bundesliga leh DFB-Pokal nomawi an chawi a, match 49-ah goal 18 leh assist 20 a nei.