India aiawh tur Ṭhazuala & Ramsanga

Mizo shuttler ṭha H. Lalṭhazuala leh C. Lalramsanga te chuan Badminton Asia Junior Championship 2025-ah India ai an awh dawn - July 23-27 a Solo (Surakarta), Indonesia-a neih tur inelnaah hian India tan an inlan ang.

Badminton Association of India (BAI) chuan June 8-11, 2025 chhung khan Final Selection Trial, New Delhi-ah an buatsaih a, he ta inlan tur hian Mizoram player pathum, Ṭhazuala, Ramsanga leh Lalrempuii te chu an ko.

Ṭhazuala hi Boy's singles category-ah inlanin, Ramsanga leh Rempuii te chu Mixed doubles category-ah an inlan thung - a tawpah Ṭhazuala leh Ramsanga te an invaw kai.

Chanmari West rawlthar Ṭhazuala inlanna Boy's singles category-ah India top player 11 koh an ni a, group A leh B-ah ṭhen an ni. Ṭhazuala hi group A-ah awmin, India no 2 Gnana Dattu TT, India no 5 Suryaksh Rawat, India no 7 Sarvesh Mahesh Yadav, Badminton World Federation (BWF) ranking-a no 10 ni phak Sai Prasad Teegala leh no 13 Abishek Kanapala te chu a hneh vek!

Group A leh B-a point hmu sang ve ve pahnihten second stage an khel leh a, an inkhel kual vek. Ṭhazuala hian India no 4 leh Men's singles-a India no 6 ni mek Rounak Chouhan chu straight set-in a hneh a, ranking no 3 Pranauv Ram N chu deciding game-ah hneh zuiin, a match tawp berah group stage-a a hneh tawh Suryaksh Rawat chu hneh nawnin, India ai a awh dawn.

Mixed Doubles category-ah final selection trial hmachhawn turin India Junior player ṭha leh ranking nei sang pair ruk koh an ni a, Ramsanga leh a ṭanpui Taarini Suri te an tlang.

Durtlang rawlthar Ramsanga leh a ṭhiannu hian an match hmasa berah top seed Vansh Dev leh Shravani Walekar te hneh nghalin, Mithilesh PK leh Reshika U te an hneh zui a, Bjorn Jaison leh Vishakha Toppo te inkawp leh Showrya Kiran J leh Lalrempuii te ṭangdun hneh leh bawkin, chak loh nei loin an tlang.

Serchhip tleirawl Rempuii erawh a vanduai a, girls doubles lamah pawh chance nei mah se, a partner hlun kianin, a inlan ta lo. Mizoram Badminton Association (MBA) chuan player-te an chhuan thu sawiin, tun dinhmun an thlen theih nana an thawhpuite chungah lawmthu an sawi bawk.

MBA hian TATA Trusts, Pullela Gopichand Badminton Academy (PGBA), NEIDA, Mizoram State Sports Council (MSSC), Sports and Youth Services Department leh Mizoram Badminton Centre, Zuangtui enkawl tirtu Aizawl Smart City Limited chungah lawmthu an sawi.