Elliott hma hun chiang lo

Liverpool midfielder Harvey Elliott chuan tun nipuiah a hma hun a tihchian tur thu a sawi. Kum 22 mi midfielder hi season hman zawh takah khan hliamin a tibuai a, a dam hnuah pawh Reds tan hmun a chang tam tawk lo.

English midfielder hian league match 18 chiah khelin, heng zinga 16-ah hian bench aṭangin a lut a, a bul ṭan pahnih hi an champion tih a chian tawh hnua Chelsea leh Brighton & Hove Albion an hmachhawnna a ni.

Elliott hian inelna hrang hrangah match 28 khelin, heng zingah hian vawi ruk chiah bul a ṭan a, goal nga khungin, assist vawi thum a nei - 2023-24 season-ah khan match 53 khelin, vawi 27 bul a ṭan a, goal li khungin, assist 11 a nei thung.

Liverpool midfielder chuan, "Kum 22 ka ni tawh a, season tharah chuan kum 23 ka ni mai dawn. Hei vang hian ka team nen ka hma hun kan sawi a ngai. Football career hi rei lo tak a ni a, chuvangin hun khawhral mai mai ka duh lo," a ti.

Elliott chuan, "Hma ka sawn theih dan pawh ngaihtuah tel a ngai a, club danga ka insawn vanga hma ka sawn thei dawn a nih chuan ka hreh lo. Liverpool chhuahsan hi ka duh hran lo a, club, fans leh team ka hmangaih a, mahse, ka tana ṭha tur ngaihtuah a ngai.

"Ka inhliam khan a harsa sawt dawn tih chu ka hria a, kha aia tam zawk erawh inkhelh ka beisei ve a ni. Mahse, hei hi football chu a ni miau si," a ti - Reds hian Bayer Leverkusen aṭangin attacking midfielder Florian Wirtz an la lut dawn a, Elliott tan chance a tlem lehzual sawt ang.