Lewandowski a titau!

Poland tana goal khung hnem ber record chelh mektu Robert Lewandowski chuan a captain nihna hlihsak a nih hnuah, an ram coach atana Michal Probierz hman a nih chhung chu Poland tan inlan a tum tawh loh thu a sawi.

Michal Probierz hian Inter Milan midfielder Piotr Zielinski chu ram captain thar atan a ruat a, Polish FA chuan an coach hian Lewy bakah, an squad pumpui chu a thutlukna hi a hrilh thu an sawi. Mahse, Lewy a lungawi thei lo.

Poland tan match 158 a khelha goal 85 khungtu striker chuan, "Thil thlen dan piah lamah, coach chunga rinna ka hloh tawh avangin, Probierz hi kan ram coach a nih chhung chuan ram tana inlan tawh lo turin thutlukna ka siam a ni," a ti.

Barcelona striker chuan, "Khawvela fans nei ṭha ber ram tan hian ka la inlan leh theih ka beisei," a ti zui - Poland hian zanin dar 12:15-ah Finland nen World Cup qualifier match an khel dawn a, match hnih an khelh tawhah an chak ve ve.

Kum 52 mi Probierz hian September 2023 aṭang khan Poland hi a enkawl ṭan a, mahse, Euro 2024-ah group mawngphah nihpuiin, he inelnaa petchhuah hmasak ber team an ni hial.