Chelsea-in Sarr la lut

London club Chelsea chuan defender Mamadou Sarr chu Strasbourg aṭangin pound maktaduai 12-in an la lut a, kum riat chhung atan contract an ziahpui - an duh chuan tun thlaa khelh tur Club World Cup-ah an chhawr nghal thei ang.

Kum 19 mi centre back la lut tur hian Blues hian January khan Strasbourg hi inremna an lo neihpui tawh a, Ligue 1 club hi Chelsea neitu Todd Boehly leh Clearlake Capital te ta tho a ni a, sumdawng pahnih hian BlueCo umbrella hnuaiah club pahnih hi an enkawl.

French defender Sarr hian season hman zawh takah khan Strasbourg tan match 28 a khel a, Ligue 1-ah pasarihna an ni. Blues hian nipui transfer-ah player pali an lakluhna chiah a ni a, Sarr hma hian Liam Delap (Ipswich Town - £30mtd), Estevao (Palmeiras - £29mtd) leh Dario Essugo (Sporting Lisbon - £18mtd) an la lut tawh.

Chelsea hian tun nipuiah CWC an khel dawn a, LA FC, Brazilian club Flamengo leh Tunisian champions ES Tunis te nen group khatah an awm ho.