Thunder an chak ve leh phawt

Shai Gilgeous-Alexander-a point 34 neih hmangin Oklahoma City Thunder chuan Indiana Pacers 123-107 in an hneh - NBA Finals khelh laiah team pahnihte 1-1 in an inhnehtawk mek.

Game 1 an khelh ṭumin a tawpah Thunder an vanduai a, hun tawp hma chiahin Pacers an chak a nih kha. Game 2-ah erawh an phu zawk an nihna ang ngeiin an chak, best of seven series a nih avangin hmabak erawh a la tam. June 12, Ningani zing dar 6:00 hian game 3 an khel leh ang.

Paycom Center-ah Gilgeous-Alexander a che na, basket a neih hmasak ber chu season kal laia Thunder lamin point 3000 an neih tlinna a ni hial a, NBA team zingah season khat chhunga hetiang zat point hmu thei hi team 12 chauh an la awm.

Gilgeous-Alexander chuan, "Kan khingpui lam khan minute 48 chhung ṭha takin an khel thei a, kan tan chuan hna a awlsam lo hle. Second tin mai kha a pawimawh vek a, tihsual kan neih chuan min hrem let nghal zel.

"Second tlemte lekah pawh danglamna a thleng thei a ni tih a takin kan hre tawh, chuvangin a tawp hma chuan inthlahdah a rem lo," a ti. NBA Most Valuable Player Gilgeous-Alexander hian rebound vawi nga lain assist vawi riat a nei bawk.

Thunder tan hian point 19 neitu Jalen Williams bakah Aaron Wiggins (18 points) a che ṭha a, game 1 an khelh ṭuma point ruk chauh hmutu Chet Holmgren chuan point 15 lai neiin an chak theih nan a thawh hlawk ta hle bawk a ni.

Pacers player ṭha Tyrese Haliburton chuan point 17 a nei thung a, an player zinga mi pasarih ngawtin point 10 an nei tling thei. Mahse, mimala che ṭha fal an awm lo a, chakpui tham khawpa langsar an nei lo.

Haliburton chuan, "Game hmasa pahnih chauh a la ni a, tah chuan pakhat zawk kan la. Match lehpekah chuan keimahni khelmualah kan khel ve thung tawh dawn a, result ṭha zawk kan neih theih ka beisei," tiin a sawi.

NBA champion ni turin a tlem berah vawi li tal chak a ngai. Game 3 leh 4 hi Pacers khelmual Gainbridge Fieldhouse-ah an khel dawn a, an dinhmun siamṭhat theihna remchang a ni ang.