Boruak sâng ngamtu Alcaraz

Dinhmun hniam zawk a nih laiin a chiai lo a, mipui lam aṭangin a khingpui an thlawpna thu ring tak taka hriat tur awm mah se Carlos Alcarz-a'n a danglam phah lo, thil tih hmanga chhangletin a beng a hup khum ngam tlat.

Spanish star hian tennis a khelh hun chhungin, tun hma chuan set hmasa pahnih a hloh hnuah a la tho chhak leh ngai lo. French Open bikah an khingpuiten 'championship point' vawi thum an hmuh hnua hneh let thei pawh an la awm ngai lo.

Mahse, kum 22 mi Alcaraz chuan midangin tih theih loha an ngaih kha a ti thei tlat si a ni. Alcaraz chuan, "Duhthusam anga awm thei ni ila chuan set hmasa pathum laka chak zawk nih mai kha ka duh dan a ni.

"Amaherawhchu, kan duh anga thil a kal lo a nih chuan thil thleng mila kan insiamrem ve mai kha a ngai a, beidawng miah loin tho chhuak leh turin kan theihtawp kan chhuah zawk mai tur a ni," tiin a sawi, a beidawn duh loh rah chu a seng.

Spanish star chuan sawi chhunzawmin, "Set ka hloh a, dinhmun derthawng takah ka ding tih pawh ka inhria. Rilru fim tak ka pu a, player ropui leh sulhnu nei ṭhate chu hetiang hunah hian huaisen takin an ding chhuak ṭhin tih chu ka in fuihna a ni.

"Tawp san hun a ni lo a, zam loa hmachhawn hun zawk a ni. Ka hma lama chona awm kha ka hmachhawn hlau lo a, eng pawh thleng se pawm thiam thei tur leh a chungnung zawk ni ngei tur khan ka bei tawp mai a ni," tiin a sawi.

Darkar nga leh minute 29 an inkhelh hnuah Alcaraz hi a chak a, a vawi nan nan Grand Slam nomawi a chawi. French Open final hi major tournament final ropui tak tal dangte nen an sawizawm nghal - Federer, Nadal leh Djokovic te vanglai nen an sawi zawm bawk.

Alcaraz chuan, "Mi ten Grand Slam final ropui tak takte nen an lo khaikhin ve tih ka hria, ka tan chuan thu lawmawm tak a ni. Mahse, a nihna takah chuan match ropui huangah tel ve turin a ṭha tawk em tih pawh ka sawi thiam rih lo.

"Grand Slam mai bakah Roland-Garros huangah sulhnu ṭha tak kan hnutchhiah tih erawh ka pawm a, a ropui leh ropui loh chu keini sawi tur ni loin mipui lam sawi tur zawkah ka ngai," tiin a sawi a, mite chuan an hrereng tawh thung ang.

Kum 22, thla thum leh ni thum mi chauh ni chungin Alcaraz hian Grand Slam title panga a nei der tawh - ani ang kuma majot title panga la thei awmchhun chu Rafael Nadal chauh a ni, amah ang bawka Spanish player ropui sulhnu a zui mek.

Alcaraz chuan, "Rafael Nadal hi ka idol, ka ngaihsan leh a khelh dan pawh ka entawn a ni. Amah anga kum 22 a Grand Slam nomawi panga lak theih chu mumang ang mai a ni a, tuna ka duhthusam leh kawng zawh mek hi a tawp mai loh ka beisei," tiin a sawi.