
Sinner tan a mak a na!
US Open 2024 leh Australian Open 2025 champion a ni thei a, a zawna Grand Slam noawi pathum kawl thei dinhmunah Jannik Sinner a ding hman - Italian tlangval beiseina sang tak hi Carlos Alcaraz chuan a tihtawpsak.
Kum 23 mi Sinner chuan, "Vanneih thlak takin Novak Djokovic leh Rafael Nadal te nen Grand Slam kan khel ho hman a, hetih lai hian Roger Federer nen erawh kan intum hman lo - tunah Carlos nen kan inhmachhawn leh ta, boruak a danglam vek.
"Tun hma lam aiin ball kal a chak zawk a, tharum hman a ngai nasa em em bawk. Carlos nen match hautak kan khel a, keimahnin pahnih mai bakah tennis khawvel tan chanchin ṭha a nih ngei pawh ka beisei.
"French Open final rei ber kan khel a ni a, champion ta chiah lo mah ila lawmna tur a awm - thil thleng hi kan duhthusam a nih vek loh pawhin vawi leh khata thlak danglam nghal vek theih a ni ṭhin lo, kan pawm thiam a ngai ve ṭhin," tiin a sawi.
Sinner hi Alcaraz aia a upatna thla 19 pawh a tling lo, kum inthlau lo tak an ni. Italian tlangval hian major title pathum a la tawh thung a, an vanglai a inrual dawn avangin inelna hautak leh hmuhnawm an chhawp chhuak chho zel dawn tih a chiang.
French Open hma chiah khan Italian Open final-ah an intawng bawk a, clay court inelna tho niin Alcaraz hi straight set hmangin a chak zawk; kum naupang zawk hian record a neih ṭhat zawk rih avangin Sinner tan thapui thawh a ngai chho dawn a ni.
Clay court inelna lian a zo a, tunah chian grass court season an hmang ṭan ang. June 30 aṭangin Wimbledon khelh ṭan a ni dawn. All England Club-ah hian a kum zawnin Alcaraz hi a champion mek, amah elphak leh ber tur chu Sinner hi a ni ang.