Hamilton-a'n Rosberg a hnaih zel

Formula 1 season khar a hnai tawh a, intlansiak hma-bak pahnih chiah a awm tawh. Mercedes driver Lewis Hamilton-a'n Mexican Grand Prix-ah hnehna a chan ve leh tak avangin a teammate leh championship hmahruaitu ni bawk Nico Rosberg a phak lohna chu point 19 chiah a ni ta.

Pathianni zana tlan zawh tak Mexican Grand Prix-ah Hamilton hi kawng kawi hmasa berah kual sual deuh mah se a buai chhunzawm lo a, lap 71 an tlan zawh meuh chuan chuh buaitu awm loin pakhatna a ni a - German driver Rosberg chu pahnihna a ni thung.

World champion vawi li ni tawh Sebastian Vettel a che fuh tawk lo a, Red Bull driver Max Verstappen lakah a chet mawi loh avangin hrem a tawk. Dutch rawlthar duhawm Verstappen chu palina niin German driver Vettel chu a hnung chiahah a thleng ve bawk. Force India driver Nico Hulkenberg leh Sergio Perez te chu pasarihnaah leh 10-naah thlengin point an hlawh chhuak ve ve.

Season hmasa leh tun season-ah Mercedes team-in Formula 1 inelna an thunun hneh hle a, kuminah hian intlansiak vawi 17 zetah an driver ten hnehna an chang tawh. Formula 1 inelnaah season khat chhungin team pakhatin hetiang zata tam hi hnehna an la chang ngai lo.

Kum 31-a upa Hamilton chuan, "Mexico-ah ka vawi khat hnehna channa chiah a ni a, ka hlim hle. Nico a che chhe bik lo a, inelna a hautak chho zel dawn. Kei chuan ka sawi lawk tawh angin a tawp thlengin ka bei chhunzawm dawn," tiin a sawi.

Champion lai Hamilton hian Formula 1 intlansiakah vawi 51 hnehna a channa chiah a ni a, pole position aṭanga bulṭan chunga vawi 30 hnehna a channa chiah a ni bawk - a tluk loh chu vawi 40 hnehna chang thei Michael Schumacher chiah a ni tawh.

Rosberg chuan, "Ka din-hmunah ka lawm a, pakhatna nih duh mah ila ka elpuite an ṭhat em avangin a harsa a ni. Lewis nen kan inel hnuah Max Verstappen nen inelna hautak kan neih bawk avangin ka tan chuan pahnihna nih hi a ṭha tawk rih viau," a ti.