Didika'n Highlanders a chhuk en

Mizo tlangval Lalrindika Ralte tak tak kan hmu leh ta - hliam vanga season hmasa ISL a khelh loh hnuah Didika'n tun season-ah Atletico de Kolkata kawr hain a hmel a lan a, Lunglei tlangval hian minute 90 khel turin a dam chiang leh tawh tih lan nan Zirtawpni zana NorthEast United an hnehna inkhelah Winning Pass of the match leh Emerging Player of the match chawimawina a dawng.

NorthEast United-in hnehna an chan chuan hma an hruai thei dawn tih inhre mah se ATK an ngam lo.

Uruguayan striker Emiliano Alfaro chuan a dan pangngaia goal khungin Highlanders chu hma hruaipui mah se Kolkata-in Didika an nei a, I League lama East Bengal midfielder hian Portugal international hlui Helder Postiga leh Spanish forward Juan Belencoso goal khung tur siamsakin Kolkata hi 2-1 in hnehna a chanpui a ni. Kolkata tan Robert Lalthlamuana chu substitute bench aṭangin tlan luhtir a ni bawk.

Didika a ṭang

ISL ṭantir lamah Didika'n hmun a chang tam tawk lo a, substitute bench aṭangin match tam zawkah tlan lutin a hun ṭha neih erawh a chhawr ṭangkai nghal. Didika chuan, "Calcutta Football League ka khelh avangin ISL pre-season ka zawm ve thei lo a, thla khat zeta ATK ka zawm tlai avangin ka khelhpui ten coach game plan an hrechiang zawk a, heivang hian coach pawhin a tir lamah min ring ngam lo. Season hmasa ka hliam erawh Pathian zarah a ṭha tawh a, buaina ka nei lo," tiin hliam vanga a buai tawh loh thu a sawi.

Didika chuan ISL match awm zel tur thlirlawkin, "Tunah table chung ber luah mah ila match sarih khelh tur kan la hmabak a, semifinal lut tur chuan hahdam a la thiang lo. ATK-ah hmun pawimawh chang zel turin ka bei ang a, coach thutluknaah a innghat tih hre reng chungin practice naah pawh theihtawp ka chhuah chhunzawm zel dawn a ni," a ti.

Hmabak eng Jerry

Didika chet ṭhat hnu lawkah Mizo player dang an lansarh chhunzawm ve lehnghal a, a hming chu Jerry Lalrinzuala a ni. Bethlehem rawlthar Jerry-a khelhna Chennaiyin chuan Inrinni zan khan South Indian derby-ah Kerala Blasters an mikhual a, team pahnih hi goal khung loin an inhnehtawk - Chennai club-in goal an chhuah loh nana bang rinawm Jerry hi Emerging Player of the Match chawimawina pek a ni.

Bethlehem left back Jerry hian ISL khelh mekah Emerging Player of the Match chawimawina vawi li a dawng tawh a, Winning Pass of the Match chu vawi khat a dawng bawk. Jeje Lalpekhlua'n Indian left back
ṭha ber a la nih theih tur thu a sawi Jerry chuan, "Hetiang taka ISL ka hman ṭhat hi ka beisei lo a, ka lawm takzet a ni. Theihtawp ka chhuah zel ang a, coach-in min rintawk bawk avangin hmun chan zel pawh ka beisei," tiin Vanglaini palai a hrilh.

French club FC Metz-a trai-ning Jerry hi inkhelh zawhah an khingpui Kerala Blasters coach Steve Coppell chuan a ko hrang a, "Hmabak eng tak i nei, ṭang zel rawh," tiin a hrilh! Kum 62-a upa Coppell hi Manchester United winger hlui, England tan vawi 42 inlana goal sarih khung thei, football a chawlhsan hnu pawha Manchester City leh Crystal Palace manager lo ni tawh a ni a, Jerry-a talent a hmuh hmaih lo.

Jeje Lalpekhlua tan Chennaiyin starting XI-ah hmun a awm lo a, Mizo tlangval hi second half-ah goal khung beiseia luhtir ni mah se Kerala Blasters tlarhnung tana hnawksak turin Hnahthial tlangvalin hun a nei tam tawk lo a, a team a chakpui thei ta bik lo a ni.

Mimal Lawmman

NorthEast United 1 - 2 Atlético de Kolkata

Winning Pass of the Match Lalrindika Ralte, Atlético de Kolkata

Emerging Player of the Match Lalrindika Ralte, Atlético de Kolkata

Hero of the Match Helder Postiga, Atlético de Kolkata

Chennaiyin FC 0 - 0 Kerala Blasters

Emerging Player of the Match Jerry Lalrinzuala, Chennaiyin FC

Hero of the Match Cedric Hengbart, Kerala Blasters

*Zaninah inkhel a awm lo ang

Team Dinhmun

Team Pld W D L GF GA GD Pts

Atlético de Kolkata 7 3 3 1 8 6 2 12

Mumbai City 7 3 2 2 7 6 1 11

NorthEast United 7 3 1 3 6 5 1 10

Chennaiyin 6 2 3 1 7 6 1 9

Kerala Blasters 7 2 3 2 4 4 0 9

Delhi Dynamos 6 1 4 1 8 7 1 7

Pune City 6 1 3 2 5 6 -1 6

Goa 6 1 1 4 4 9 -5 4