Point 23 hmuten goal li theuh an khung - Reds, City, Gunners .

Klopp-a Liverpool an kal zel

Sir Alex Ferguson-a'n Premier League champion tura Jurgen Klopp enkawl Liverpool an ṭhat tawk thu a sawi a, Manchester United coach hlui thusawi nemngheh nan Inrinni zan khan Liverpool hian Crystal Palace chu khual-mualah 4-2 in an hneh.

Liverpool tan Emre Can, Dejan Lovren, Joel Matip leh Roberto Fir-mino ten goal khat ṭheuh an khung a, ṭum dang ang bawkin Liverpool tlar-hma an hmuhnawm. Reds buaina erawh a la ngai reng a, tlarhnung lamah Croatian defender Lovren-a'n vawi hnih ngawt James McArthur-a ven zawh loh avangin Palace lam hian goal hnih an khung ve theih phah a ni.

CoutCoutinhoinho bawk

'The Little Magician' tia hminglem an pek Philippe Coutinho a lang-sar a, Liverpool chakna hnar a ni. Brazilian midfielder hian goal khung lo mah se a ṭhiante thun tur vawi hnih lai a siamsak a, Lovren leh Matip te chuan Coutinho hnen aṭanga an ball hmuh hi goal-ah an chantir.

Hei mai a ni lo, James Milner inhliam vanga a hmun ngaia let Alberto Moreno siamsak Can-a'n a khung chu Coutinho ke aṭanga chhuak a ni bawk. Coutinho hian goal khungna hun ṭha nei ve mah se Palace defender Joel Ward-a'n a kuta lo khawih perin Steve Mandanda chuan lei hrulah ṭha takin a dang a, Ward-a handball-na hi penalty pek theih a ni.

Nipui transfer-a Liver-pool zawmtu Sadio Mane pawh a hmuhnawm ngaiin a hmuhnawm reng a, Se-negalese forward hian Coutinho ball pek ṭha tak chu khungna hun
ṭha nei mah se Mandanda chuan ṭha takin a dansak. Liverpool-in tlarhma lamah khel ṭha viau mah se tlarhnung pawp avangin minute 71-naa Firmino-a'n captain Jordan Henderson ball siamsak a khung hma chu rilru hahdam takin an khel thei bik lo.

Manager thukhawchang

Liverpool manager Jurgen Klopp chuan, "Mi-nute 15 hmalam kha chu 100% in kan khel chhuak lo a, darkar chanve hnuah erawh ngai kan awh leh thei a ni. Game inhnehtawk tak a ni a, a tawpah erawh hnehna chan phu zawkin point thum kan hawn avangin tunah hian pa hlim tak ka ni," tiin a sawi.

German coach chuan tlarhnung lama an tihsual a hai bik lo. Klopp chuan sawi chhunzawmin, "Kan goal hmasa ber kan chhuah khan inkhelah kan rilru kan pe tawk lo tih a lang chiang hle. Inkhel ṭantir lamah kan rilru a paukhauh tawk lo tih tlarhnung khelh dan aṭangin kan hmu thei a, kan tlarhma lamah erawh thil ropui tak tak ka hmu a ni," a ti.

Crystal Palace boss Alan Pardew chuan, "Theih-tawp chhuahin kan khel a, tlarhnung lam pawhin an theihna zawng zawng an pe a ni. Mahse, khai aia na zawk khan Livepool kha pressure pe thei tur kan ni a, team ṭha tak an nih miau avangin kan ruahmanna a hlawhtling thei lo a ni," tiin chak phu zawkin hneh-na an chan thu a sawi.

Aguerooo

Manchester City-in Premier League hma-hruaitu ni turin West Brom 4-0 in a sawp. Argen-tine forward Sergio Aguero-a'n goal khung a thiam tih lantirin goal hnih a khung a, Germany international midfielder Ilkay Gundogan-a'n hetiang zat bawk hi a khung ve bawk.

A tawp ta

Manchester City leh Pep Guardiola ten inelna hrang hrangah match ruk chhung chak hmel an hmu tawh lo. Inrinni zanah erawh minute 19-na lekah Gundogan-a through ball chu Aguero-a'n chiang takin a khung.

Mualneitu Baggies-in an mikhual City an ngam lo a, Aguero-a'n minute 28-naah goal hnihna a khung. Second half-ah West Brom insiamṭha mah se Gundogan-a'n minute 79 leh 90-naah City tan goal a khung.

City-in hnehna an chang takah chuan Pep Guardiola-a'n manager hna a chelh hnua chak hmel hmu loa a hun tawn rei ber chu a tawp ta bawk.

Pep-a thukhawchang

City manager Pep Guardiola chuan, "Chak loh hi chuan rinhlelhna a awm ṭhin a, West Brom nen pawh khan second half kan khelh ṭhat loh avangin rinhlelhna ka nei ṭhin bawk. Vawi ruk a zawna chak hmel kan hmuh loh pawh khan rinhlelhna chu ka nei ngei a, mah se ka khelhtir dan phung erawh ka ringhlel ngai lo," tiin a khelh dun dan ni loin player chungah ringhlelhna a neih ṭhin thu a sawi.

Spanish manager Pep chuan sawi chhun-zawmin, "Sergio hi kan mamawh a, khelmual chhungah chu chu chiang takin a lantir a ni. Kei chuan player ṭha zawkah siam ka tum dawn a, chu chu ka hmabak a ni," tiin Aguero chu player ṭha zawka siam a intiam.

Laipui a puak ring

Arsenal-in minute ruk leh second 20 chhung lekin goal thum an khung thei a, Inrinni zan Premier League inkhelah Sunderland 4-1 a sawpin ma-nager David Moyes chu din-hmun derthawngah an dah.

Stadium of Light-ah Alexis Sanchez chuan Alex Oxlade-Chamberlain-a cross tauh lutin Gunners goal hmahruai a khung a, second half-a Jermain Defoe penalty chhuih luh chu Arsene Wenger-a naute chhaih thinrimtu mai a ni.

Striker Olivier Giroud-a'n a hliam a dam tawh tih lantir nan khelmual chhunga a ball khawih fuh hmasa pahnih chu goal-ah a chantir! French international hian Kieran Gibbs-a siamsak chu a volley luh bakah Mesut Ozil corner pet a tauh lut bawk - goal ṭha pahnih an ni.

Goal thum an khung hnu-ah Arsenal-in an la duh-tawk mai lo, Chile international Sanchez chuan hnai set sawt aṭangin chiai miah loin an goal lina a khung zui zat bawk. Gunners goal hnuhnung pathum (Giroud 71', 76' leh Sanchez 78') te hi minute ruk leh second 20 chhung leka lut a ni.

Arsenal boss Wenger chuan, "Kan si phurh an rawn sut chiah khan kan tan chuan rilru put hmang fiahna ṭha tak a ni. Player inhliam an dam chho a, ka naute zingah ṭha tak taka khel thei an tam avangin ka tan khelmual chhunga lut tur thlan kawngah harsatna a awm lo ang," a ti.

Giroud hliam chhung zawng khan Wenger hian Sanchez chu striker atan a chhawr ṭhin a, ani hian league match a khelh hnu-hnung pariatah goal nga khungin a ṭhiante khung tur vawi thum a siamsak bawk. Season ṭan nia inhliam Aaron Ramsey pawh a hliam dam tawhin goal ban a pet per.

Black Cats an buai

Premier League season kal mekah Sunderland hian match 10 an khelh aṭangin chak ni hmel an la hmu lo a, anni hi hneh la nei lo awmchhun an ni. Stadium of Light-ah fans rinawm 44,322 pungkhawmte chu inkhelh tawp hmain an beidawng tih a lang, hun tawp hmain an haw! Manager Moyes hian a hna ngai chelh chhunzawm tur chuan insiam ṭhat ran a mamawh hle ang.

Black Cats hian point hnih chauh la hmuin table mawngphah luah lumtu an ni a, league-a season bul an ṭan chhiat ber ṭum an tawng mek. Premier League club-te zingah anni aia season ṭan chhia hi an la awm ngai lo, kum 1995-96 khan Manchester City chuan an match hmasa 10 aṭangin point hnih chiah an lo hmu ve tawh tho a, mahse Sunderland (-13) ai hian goal difference an nei ṭha zawk.

Sunderland manager Moyes chuan, "Ka nauten khelmual chhungah theih-tawp an chhuah a, keini aia ṭha zawk kan hmachhawn avangin a harsa a ni. Inhliam kan ngah avangin thil a harsa a, football chu kan result chauh an teh
ṭhin hi a pawi," tiin hliam vanga an buai thu a sawi.