Napoli laka goal khungtu Higuain

Khawvela player man to pathumna Gonzalo Higuain chuan Inrinni zan khan a vawi khat nan a club hlui Napoli hma-chhawnin Juventus tan chakna goal a khung. Juve hian 2-1 a hnehna changin Serie A hmahruaitu an nih chhunzawm zel.

Inkhelh ṭan hmain Napoli manager Maurizio Sarri chuan 'Pa in a fapa thuawih lo a dawnsawn angin' Higuain chu a hmachhawn tur thu a sawi a, hei hian inkhel tur boruak thui tak a hril. Sarri hian Napoli fans rilru na leh boruak sang lutuk tur tih daih nan Higuain a huat loh thu a sawi a ni.

Turin-a inkhelah goal a lut lawk lo a, minute 50-naah Juve tan Leonardo Bonucci-a'n goal hmahruai khung mah se goal luh aṭanga minute li hnu lekah Napoli tan Jose Callejon chuan a sut ve nghal. Team pahnihte an inhnehtawk dawna a lan hnuah Higuain-a'n minute 70-naah a man to chhan a lantir.

Kum 28-a upa Higuain hian Sami Khedira ball tauh an dan rawn kal let chu box chhung laihawl
aṭangin hatsatna nei loin a chhuih lut. Higuain hian a goal khung hi a lawm (celebrate) hran lo a, a club hlui Napoli fans laka ngaihdam dil nan a ban a phar chhuak hram.

Juve hian match 11 an khelh
aṭanga point 27 hmuin Serie A table hmahruaitu an nih chhun-zawm zel a, season hmasaa anmahni elphak bertu Napoli nen hian point sarihin an inthlau tawh. Pahnihna AS Roma aiin point ngain an sang zawk mek a, chutihrualin nizan inkhel result a zirin an hmahruaina zat hi a danglam thei thung.

Season hmasa khan Argentina international Higuain hian Napo-li tan Serie A match 35 a khelh aṭanga goal 36 khungin Italy league season khat chhunga goal khung hnem record a siam a, a club hi pahnihna nih puiin an tluk loh chu Juventus hi an ni.

Nipui transfer hun a lo thleng a, Higuain hian an hmelma leh elpui Juve chu pound maktaduai 75 zetin a zawm. Napoli fans thinlung a dam thei lo a, a jersey bakah a hming lanna leh a lem chuanna banner leh scarve-te an hal hial - an player ṭha berin an elpui club a zawm chu an hrethiam thei lo a ni.

Inkhel dangah Fiorentina chuan Nikola Kalinic-a penalty chhuih luh hmangin an mikhual Bologna an hneh a, a zawnin match nga chhung hneh loh an tawng tawh lo. Point 16 hmuin league table-ah paruknaah an invawrh chho.

Eng nge an sawi?

Juventus boss Massimiliano Allegri chuan, "Gonzalo hian theihna sang chungchuang bik a nei a, a thiamna bakah a thawhrimna hian fak a phu. Kan hnena a rawn kal avang hian phatsantu ang hiala sawichhiat a tawk a, chutiang chu a ni lo. Ani hian rilru ngil tak a pu a, kan hnen a rawn pan duh hi kan tan chuan malsawmna a ni," a ti.

Napoli manager Sarri chuan, "Higuain-a hmaah ball i hloh a nih chuan i tan thihna a ni mai. Defender tan chuan ani hmaah hian tihsual pakhat pawh a awm thiang lo, a chhan chu min hrem nghal zel vang a ni. Juve a zawm hian mi ti lawm lo ngei mai, chutihrual chuan kan tan thil ṭha tam tak a lo tih tawh avangin ka haw hran lo," tiin a striker hlui chungchang a sawi ve bawk.