Bayern tan Lewandowski-a'n goal khung leh ta

Robert Lewandowski-a'n a zawnin inelna hrang hrangah match nga chhung Bayern Munich tan goal a khung loh chu a tawp ta. Inrinni zan khan Poland striker hian Augsburg lakah goal hnih khungin a club hi 3-1 in hnehna a chanpui.

Carlo Ancelotti a naute hian first half-ah Lewandowski goal hnih leh Arjen Robben-a goal khat hmanga si thum faia hma an hruai avangin harsatna nei loin poin thum an hmu. Club pahnihte hi Thawhlehni zan khan German Cup-ah an lo intawng tawh bawk a, Bayern hian 3-1 thoa hnehna changin last 16 an lo inpet kai tawh.

Bayern hian match kua khelh tawh aṭanga point 23 hmuin hma an hruai zel a, inkhel dangah RB Leipzig chuan midfielder Marcel Sabitze goal hnih khung hmangin Darmstadt lakah 2-0 a hnehna changin champion lai hi an thlahfal duh lo - point hnih chiah an inkarah a awm.

Bayern Munich boss Carlo Ancelotti chuan, "Minute khatna lek aṭang-in ṭan kan la nghal a, minute 90 chhung inthlahdah loin kan inkhel thei. Robert Lewandowski leh Arjen Robben ten goal an khung a, kha aia tam zawk an la khung chhunzawm ka beisei. Season rei tak kan la hman dawn avangin ni khat atan vawi khat hnehna chan hi a tawk," tiin a sawi.

Kum 28-a upa Le-wan-dowski chuan, "Dawh-theihna neih a ngai a, striker ka nih anga goal ka khung lo a nih chuan ka chungah boruak dang a awm nghal mai ṭhin. A chang chuan dawhthei taka kan goal khung hun tur kan nghah a ngaih chang a awm," a ti. Lewandowski hian con-tract thar a la ziah chiah loh thu leh inbiakna an neih mek thu a sawi tel bawk.

Dotrmund an chelh

Thomas Tuchel-a en-kawlna hnuaia a vawi khat nan Borussia Dortmund chuan Bundesliga match an khelh hnuhnung paliah hnehna an chang zo ta lo, vawi khat chak loin vawi thum dang chu an khingpuite nen an inhnehtawk thung.

Season hmasa aṭang khan Tuchel hian Dortmund hi a enkawl ṭan a, tun ang reng renga chak ni hmel hmuh loh zawn rei hi an nei ngai lo, Inrinni zan khan an mikhual Schalke nen goal awm loa inhnehtawkin league hmahruaitu Bayern Munich chu point riat zetin an phak tawh lo.

Tuchel chuan, "Tih-sual kan ngah, chu-tihrualin hnehna chan phu zawk chu kan ni. Ka nauten an khel ṭha thawkhat a, point thum hmuh phu tur erawh chuan duhthu kan sam bik lo. Football-ah chuan kan phu tawk ang result kan nei reng thei lo tih hi a chiang a ni," tiin a sawi.

Dortmund tan hian Mario Gotze leh Christian Pulisic ten goal khung theihna hun ṭha an neih an chhawr ṭangkai thei lo a, hliam vanga German Cup khel lo striker Pierre-Emerick Aubameyang lo kir mah se goal hmaah a hriam tawk rih bik lo a ni.