Warriors chak niah Curry a vul

Golden State Warriors chuan Inrinni zing khan New Orleans lakah 122-114 in hnehna an chang a, NBA Most Valuable Player Stephen Curry chuan NBA chanchinah bung thar ziak lehin three points vawi 1,600 vawm lut thei rang ber a ni.

American point guard hian three points vawi 1,600 nei tur hian match 497 chiah a mamamawh a, record lo siam tawhtu Ray Allen chuan match 693 a mamawh thung. Curry hian record siam tur hian Allen aiin match 200 deuh thawin a khel tlem zawk. Season hmasa bikah khan vawi 402 zet three points lutin season khat chhunga three points lut hnem ber record a lo siam tawh bawk.

Golden State hian tun season-a an match hmasa berah San Antonio Spurs an hneh lo a, an match hnihnaah erawh an insiam ṭha chiang hle. Player thar Kevin Durant chuan point 30 score-in Stephen Curry (23 points) leh Klay Thompson (28 points) ten an pui ṭha hle.

Pathianni zing khan champion lai Cleveland Cavaliers pawhin Eastern Conference lamah an match hnihna khelin Orlando Magic chu 105-99 in an hneh. NBA Finals MVP LeBron James chuan point 23 score-in a thawhhlawk ber a, Kyrie Irving, Kevin Love leh J.R. Smith te an che ṭha bawk.