Real Madrid chakna Ronaldo goal thum
Inrinni zan La Liga inkhela player langsar ber chu Cristiano Ronaldo a ni - Real Madrid forward hian Inrinni zana Alaves an hnehna inkhelah hattrick a siam a, khualmualah a team hi 4-1 in hnehna a chanpui.
Atletico Madrid chuan an match hnuhnung berah Sevilla hneh lo mah se Malaga lakah an insiamṭha nghal a, 4-2 in hnehna an chang. Barcelona-in table chung bera awm Real Madrid thlah fal lutuk an duh bik lo a, Rafina goal khat khung hmangin an mikhual Granada chu 1-0 in an hneh.
Ronaldo a lo kir
Inrinni zan league match khelh hmain Cristiano Ronaldo-a'n tun season La Liga-ah match ruk khelin goal hnih chiah a khung a, amah sawiseltute nuam tih vanglai tak a ni. Mahse, Inrinni zanah erawh Portugal captain hian goal khung a la thiam tih pholangin goal thum a khung a, amah sawiseltute khelmual chhungah thil tih hmangin a chhanglet.
Beisei loh takin Alaves hian minute 7-naa Deyverson goal khung hmangin hma an hruai a, minute 17-naah Ronaldo-a'n penalty hmangin an si phurh a sut. Portuguese forward hian chawlhlawk hmain goal khat dang khung leh mah se a penalty pahnihna erawh a khung thei lo. Minute 80 hnu lamah Alvaro Morata chuan goal khat dang khung ve lehin Ronaldo-a'n a penalty khung loh thup nan minute 88-naah a khung ve leh bawk.
Real coach Zinedine Zidane chuan, "Ronaldo khan khelmualah amah sawiseltute a chhang a, a khelh dan kha eng hawi zawng pawn a ṭha em em ringawt mai a ni. Zaninah pawh khan a dawhtheihna lantirin rim taka a hnathawh chu a pho chhuak a ni," tiin goal khungtu Ronaldo a fak.
Atletico an tho
Sevilla an hneh loh hnuah Atletico Madrid-in mutthluk reng an duh lo a, Kevin Gameiro leh Yannick Ferreira-Carrasco te goal hnih ve ve khung hmangin Malaga chu 4-2 in an hneh. Atletico tan minute 7-na lekah Carrasco-a'n goal hmahruai a khung nghal a, Gameiro-a'n a chhunzawm.
Malaga beiseina chhi nung turin Sandro Ramirez-a'n sut ve leh mah se Gameiro bawkin Atletico tan a khung leh a, chawlhlawkah 3-1 a ni. Atletico tan Stefan Savic hnawhchhuah a nih hnuah Malaga beiseina chhi nung turin Ignacio Camacho-a'n goal khat khung mah se Carrasco chet ṭhat an tawng a, Belgian forward hian an chak nemnghehna minute 86-ah a khung a, midfielder Gonzalo Castro hnawhchhuah zui a nih bawk avangin Malaga-in beisei tur an nei tawh lo.
Atletico coach Diego Sime-one chuan, "Game harsa tak a ni chungin inkhel kan thunun thei a, hnehna chan phu mah ila awlsam taka chak erawh kan ni lo," a ti.
Barca an chak
Lionel Messi lansarh loh zanah Barcelona-in midfielder Rafinha goal danglam hmangin Granada chu 1-0 in an hneh. Brazil international hian tun season-ah league match ruk chiah khelin goal nga a khung thei. Catalan club tan inkhelh chhung zawngin Messi hmuh tur a awm mang lo a, Neymar leh Luis Suarez ten an hun ṭha neih goal khung nan an chhawr ṭangkai thei lo bawk.
Barcelona coach Luis En-rique chuan, "Harhvang taka khel tur kan nih laiin kan thei lo a, player 10-in goal venhim ringawt an ngaihtuah chuan goal khung a harsa a ni. Point thum kan hmuh avangin ka lawm a, La Liga leh Champions League-ah hmasawn zel dan tur ngaihtuah chunga hmalam kan pan thei hi ka lawm a ni," tiin goal khung harsat a naute a sawisel duh lo.