India-in New Zealand an sawp

Inrinni khan India chuan ODI series la turin New Zealand chu run 190 zetin an sawp a, Black Caps an mualpho chiang hle. Visakhapatnam khawpuia inkhelh hma hian match nga khelh turah India leh New Zeland hian match li khel tawhin vawi hnih ve ve an chak a, Inrinni inkhela chak zawk zawk hi series latu tur niin India an chungnung ta zawk.

Bat hmasa zawk India hian over 50-ah run 269 vaw chhuakin mi paruk an hloh a, run 70 siamtu Rohit Sharma leh Virat Kohli (65) te chu India tana batsman langsar an ni. India hian an bat lai hian an jersey hnungah an nu te hming ṭheuh chuanna an ha a, hei hi Star Sports leh BCCI-in nu te chawimawi nana hma an lakna kawng khat a ni.

Black Caps tan an target hi um harsa tur niin lang lo mah se vetearn bowler Amit Mishra hmaah an zawr a, an tlawm chiang hle. Over 23.1 lekah run 79 chiah tlinin an out vek! Run siam hnem ber Kane Williamson chuan run 27 a tlin thei hram.

India tan kum 33-upa Amit Mishra a che ropui a, Delhi spin bowler hian over ruk a vawmah run 18 chiah pein wicket nga a la a, a hmaah New Zealand batsman an ding rei thei lo. India hian test series-ah Black Caps hi 3-0 in an lo sawp tawh bawk a, November 9 aṭangin England nen test series an khel leh bawk ang.