Chanmari FC = Dinthar FC

Mizoram Premier League tihmuh-nawmtu Chanmari FC leh Dinthar FC ten tun hmaa an tih
ṭhin angin Zirtawpni zanah inkhel hmuhnawm bik an lantir a, semifinal-ah an intawng leh a nih ngat chuan MPL5 hlutna a sang sawt ang.

Lammual inkhel nung ṭha takah Lalruatpuia hmangin Din-thar FC-in minute 30-naah hma an hruai a, Chanmari FC-in an 'fapa rangkachak' Rochhingpuia hmangin minute 54-naah an sut. Tualchhung club inel tak pahnih hi 1-1 in an inhnehtawk a, Dinthar goalkeeper Joseph Lalruatfela chu man of the match a thlan a ni.

Chanmari FC-in point 18 hmuin hmahruaitu Bethlehem Vengthlang FC point khatin an pha lo. Chanmari boss Lalsangzuala Hmar-in Round 10-ah a club hlui BVT a hmachhawn dawn.

Dinthar FC leh table mawng-phaha awm Zo United inthlauhna point khat chauh a ni a, club pahnih hi November 3, Ningani tlaiah an inkhel ang.

Sandip aiah Samu-a

Dinthar FC-in Bethlehem Veng-thlang hnehtu aṭangin player pakhat chiah an tidanglam a, Sandip Alay aiah tawnhriat ngah zawk Samuel Laltlanthanga luhtir a ni. Winger Sandip hi October transfer hun thoa lak niin Champhaiah khan minute 87-naah tlan luhtir a ni a, BVT lakah game hmuhnawm tak khel mah se coach Lalhlupuia Sailo chuan tlarhnung tihphui a duh avangin captain Samuel Laltlanthanga a ring zawk.

Chanmari lamin Zo United an hneh ṭuma man of the match Lalrinchhana hahchawlhtirin MPL2 best player R. Malsawmtluanga'n inkhel bul a rawn ṭan a, anni pawhin player pakhat chiah an thlak.

Maimawms an chungnung

Lammualah Chanmari ṭantu aiin Dinthar supporter 'Maimawms' an tam zawk a, thawm pawh an nei ring zawk. Khelmual pawnah Din-thar hian hun eng emaw ti chhung chu Chanmari tluk lo mah se tunah erawh an elpha mai ni loin an ṭha tawh zawk.

Chanmari lamin result duhthu-sam an neih theih lohna chhanah an suppporter lam pawh inenfiah an ngai niin a lang a, Dinthar erawhin tun aia phur belh leh hret bak an mamawh tawh lo.

Michael & Ruatpuia

Minute 30-naah Khatla tlangval Michael-a'n a thiamna hmanga Chanmari defender a bum hnuin Ruatpuia a pe a, Melriat tlangval hian goal hmahruai a khung.

MPL5-a goal nga khung tawh Michael-a'n vawi tam Chan-mari tlarhnung a rum ṭhaih a, goal khung turin hun ṭha nei bawk mah se goal hmaah a vannei tawk lo.

Ruatpuia'n a tlan chak a hmang thiam a, Dintharin foreigner pahnih Balogun Hammed leh Clarence Carter te an kawl tawh bawk avangin Melriat tlangval hi goal hmaah a hlauawm lehzual. MPL5-ah tlarhma inkawp fuh bera ngaih Chanmari FC tlarhmaa awm Malsawmfela leh Lalruatfela Zote-te hi Dinthar duo Michael leh Ruatpuia-te hian an elphak ṭan tawh.

Dinthar tana thu lawmawm chu pressure sang hnuaiah an foreinger pahnih an rintlak. Nigerian defender Hammed hian a ball pet natzia lantirin minute 27-naah kawh zetin freekick a pet a, Chanmari keeper MS Dawngliana'n a dang ṭha hle.

Fapa rangkachak 'Chhinga'

MPL ṭantirha Chanmari FC innghahna chu an veng tlangval Rochhingpuia a ni Tunah bench lamah ṭhu tam deuh tawh mah se hun pawimawhah goal a thun.

Minute 54-naah MS-a freekick pet chu Dinthar keeper Joseph-a'n nam per hnuah crossbar a per tho a, chumi per chu captain Lalrinchhana'n tauh chho lehin Chhinga'n a pet goal chiang hle. Inhliam vanga match sarih chhung starting eleven chang tawh lo MS-a'n a ke vei lam a la hmang thiam reng a, free-kick hmangin Dinthar fans vawi tam a timangang.

Chanmari FC player hmuhnawm ber erawh Malsawmfela a la ni tho a, Ramhlun South tlangval hian pressure sang bik atan a thiamna a khek emaw tih mai turin Dinthar tlarhnung a bum nasa ṭhin hle.

Goal nga khung tawh striker Sawmfela hi midfield pui tura pawh let a nih avangin goal khungna chance erawh a nei tam lo a, a ball pass fing tak Fela Zote-in a khung lo chu a ui khawp ang.

Hetihlai hian Sawmfela hian chance ṭha tak a neih a thun lo ve bawk a, Dinthar keeper nen an pahnih chiaha an awm hnuah goal zawnah pet mah se keeper hian a lo khawih per hman a ni.

Vanduaina leh vanneihna

Chanmari FC winger Vanlalbiaa Chhangte chu minute 18-naah Din-thar keeper Joseph-a'n box chhungah a titlu a, penalty ni ngei tura ngaih theih ni mah se referee-in penalty a pe lo - Chanmari an vanduai.

Chutihrualin Chanmari FC-in goal khung hi offside vanga pawm loh theih a ni. MS-a'n freekick a pet hian offside position-a awm Chhinga'n ball khawih lo mah se keeper Joseph hmaa dinga a tihbuai avangin Champhai tlangvalin hmun himah ball a hnek chhuak thei lo. He ball kal zelah hian a goal zui a, a hmaa vanduai Chanmari hi an vannei tiin a sawi theih bawk.

Eng nge an sawi?

Dinthar FC coach Lalhlupuia Sailo chuan, "Tu zawk pawhin point thum hmu se kan khelh dan result mak a ni lo ang. Goal khung hmasa mah ila, point hloh thei dinhmuna kan din ve tho avangin kan result-ah kan lungawi. Entu lam tan chuan inkhel hmuhnawm tak a ni thei a, keini lam erawh kan ṭan lutuk avangin a hmuhnawmna kan tem pha lo," tiin inkhel boruak a san thu a sawi.

Chanmari FC coach Lalsang-zuala Hmar chuan, "Dinthar coach ngaihdan chu ama ngaihdan a ni a, a dik lohna a awm lo. Referee khan tih dik loh a nei nual a, a hnathawh kha en let rawh se," tiin referee thutluknaa a lungawi loh thu a sawi.

Chanmari boss hian an hmachhawn leh tur club hlui Bethlehem Vengthlang FC chu club ṭha tak an nih avangin hneh tur chuan theihtawp chhuah a ṭul tur thu a sawi bawk.

Tute nge inlan?

Chanmari FC (4-3-3) : MS Dawngliana; MS Dawngzela (C. Lalmuanawma 67'), C. Lalrosanga, Lalrinchhana, Ram­fangzauva; Rochhingpuia (Lalrinchhana 86'), R. Mal­sawmtluanga, Lalruatfela Zote; Lalrammawia (Lalmuanzova 59'), Malsawmfela, Vanlalbiaa Changte

Dinthar FC (4-3-3) : Joseph Lalruatfela; Stephen Lalnun­mawia, Vanlalchhanhima, Balogun Hammed, Stephen Lalnun­mawia; Saihmingthanga, Lalbiaknia, Clarence Carter; Samuel Laltlanthanga (Sandip Alay 75'), Michael Lalremruata, Lalruatpuia.

ZoFooty Statistics

Chanmari FC 1 - 1 Dinthar FC

CFC : Rochhingpuia 54'

DFC : Lalruatpuia 30'

MoM : Joseph C. Lalruatfela, DFC

53% Ball Possession 47%

16(6) Shots (On Target) 15(6)

0 Yellow Card 1

0 Red Card 0

Powered By Rainbow Multibrand

Mobile Showroom

Team Dinhmun

# Team Pld W D L GF GA GD Pts

1 Bethlehem VT 9 6 1 2 9 7 2 19

2 Chanmari FC 9 5 3 1 17 8 9 18

3 Chanmari West 9 5 1 3 13 8 5 16

4 Aizawl FC 9 4 1 4 8 6 2 13

5 Ramhlun North 9 3 1 5 9 13 -4 10

6 Dinthar FC 9 1 5 3 9 14 -5 8

7 Chhinga Veng 9 2 2 5 12 14 -2 8

8 Zo United 9 1 4 4 4 11 -7 7