Man City-in Ait-Nouri an la lut hnai

Manchester City chuan pound maktaduai 31-in Wolverhampton Wanderers aṭangin left-back Rayan Ait-Nouri an la lut dawn a, Inrinni khan kum 24 mi Ait-Nouri hian medical a tifel a, kum nga daih contract a ziak dawn. A chet ṭhat dan a zirin a man hi pound maktaduai ngain a pung leh thei ang.

Pep Guardiola hoten FIFA Club World Cup an hmachhawn dawn a, inelnaa Ait-Nouri an chhawr dawn a nih chuan June 10, Thawhlehni hmaa tih fel a ṭul dawn. Algeria international Ait-Nouri hi Pep-a'n left back harsatna chinfelna atana nipui bazara lak a tum ber a ni hrim hrim.

City specialist left back hnuhnung ber chu Benjamin Mendy a ni a, French defender inlan hnuhnun ber chu August 2021 daih tawh kha a ni. Oleksandr Zinchenko, Joao Cancelo leh Josko Gvardiol ten left back hna hi a chelh tawh a, nikum season tawp lamah chuan Nico O'Reilly an chhawr.

Hei vang hian Ait-Nouri hi Pep-a hnuaiah hmun pawimawh a chan nghal rinawm. Algerian defender hian kum 2021 khan £14.9mtd-in Angers aṭangin Wolves a zawm a, English club tan inelna hrang hrangah match 157 khelin goal 12 a khung. Season liam ta khan Ait-Nouri hian match 41 khelin relegation pumpelh nan a pawimawh a, goal nga khungin assist vawi sarih a nei a ni.

Man City hian January transfer-ah khan £200mtd an seng tawh a, tun nipuiah Ait-Nouri hma hian AC Milan midfielder Tijjani Reijnders chu £46.3mtd-in an lalut tawh a, Lyon midfielder Rayan Cherki a beisei bawk.