Semifinal-ah Djokovic a tla; French Open a khel dawn tawh lo?

Novak Djokovic chu Jannik Sinner hneh loin French Open semifinal-ah a tla - Grand Slam vawi 24 champion tawh hian Roland Garros a khel leh dawn em tih a sawi chiang thei lo.

Zirtawpni zan khan Djokovic hi 6-4, 7-5, 7-6 (3) in a chak lo zawkah a ṭang. Paris khawpuia tennis court hmingthar Court Philippe-Chatrier a mangṭhana ni awm takin ban a phar kual a, mipui lamin zah takin an thlah bawk.

French Open an khelh leh hunah chuan Djokovic hi kum 39 mi a ni tawh dawn. Serbian star chuan, "He hmuna ka match khelh hnuhnung ber a ni tawh mai thei, kan hma hunah eng nge lo thleng dawn engmah ka sawi lawk thei lo.

"Season dang ang chu ni se beiseina nen court ka la chhuahsan ang, mahse kumin chu a boruak a danglam ta a ni," tiin a sawi. Kum dangah chuan season tharah tun aia ṭhain ka lo kir leh ang, an ti mai ṭhin. Tunah erawh season thar a sawi thei ta lo a ni.

French Open vawi thum champion tawh Djokovic chuan, "Roland-Garros ka khelh hnuhnung ber a nih pawhin ka vui lo, a chhan chu hetiang taka thlawpna ṭha leh min nghaihlutu hi ka tawng reng lem lo.

"Kuminah duhsakna leh lawmpuina ka dawng hnem em em a, ka tan chuan lawma tur a tam. Ka hun tawp a ni tih erawh ka la sawi bik chuang lo," tiin a sawi a, clay court a khawih zauh a, a thuawmhna tel fela court a chhuahsan lai chuan a hmuna entu mipui ten ding chungin an lo thlah a ni.

Grand Slam vawi 24 a champion tawh a, amah tluktu an awm lo - vawi 22 champion tawh Rafael Nadal chu hnaih bertu ni mah se a chawl tawh, tuna tennis la khel zingah Carlos Alcaraz (4) chu Novak hnaih bertu a ni hial.

Clay court season a mangṭha rih dawn a, tunah chuan grass court lam atan rilru a pe chhunzawm ang. June 30 aṭangin All England Club-ah Wimbledon an khel chhunzawm leh nghal dawn, hahchawlhna hun a awm dawn lo.

Wimbledon vawi sarih champion tawh Djokovic chuan, "Naktukah eng nge lo thleng dawn sawi thei lo mah ila Wimbledon chu khelh ngei ka duh, ka naupan lai aṭanga tournament ka ngaihsan ber a ni.

"Grass court inelna lian ka khelh theih nan hian tih theih awm zawng zawng ka ti ang," tiin a sawi a, tennis zinkawng hnuhnung lam a zawh mek avangin a chak loh apiangin a chawlh hun tur zawhna a dawng zel tawh dawn niin a lang.

Djokovic-a'n Grand Slam nomawi a chawi hnuhnung ber chu US Open 2023 kha a ni a, season hmasa khan major title a vaw chhuak lo; kum sarih hnuah Grand Slam champion ni loin season a hmang a, kuminah Wimbledon leh US Open a la beisei mek a ni.