India coach-in champion kawng zawh a sawisel

Indian Premier League-ah a vawi khat nan Royal Challengers Bengaluru an champion a, champion lawmna kawng zawhah mi 11 an thih bakah mi ṭhahnem tak an inhiam avangin India coach Gautam Gambhir chuan a sawisel.

Gambir chuan, "Kan inpeih loh a nih chuan champion kawng zawhna neih loh mai tur. RCB ṭantute an lawm tih chu ka hria a, mi zawng zawng an phur. Mahse, a nghawng a pawi em avangin kan fimkhur a ṭul a ni," tiin a sawi.

RCB hian Bengaluru khawpuia kawng an zawh hnuah M.Chinnaswamy Stadium-ah an lut a, mipui nuai hnih chuang an pungkhawm. Gate te reuh tea luh tum vangin an inpawng nek a, chhiatna hi a thlen phah.

June 5, Ningani khan RCB chuan thuchhuah siamin nunna chan chhungte hnenah nuai khat ṭheuh a pek tur thu an puang. Gambhir chuan, "Kawng zawh kher hi a ṭulna ka hre lo a, nunna chan chhungte ka tawrhpui takzet. Mawhphurna kan lak theih a ṭul a, mi 11-in nunna an chan hi a pawi takzet a ni," tiin a sawi.

Police-in mipui nuai khat vel an pun khawm an beisei laiin Karnataka chief minister Siddaramaiah chuan nuai 2-3 vel an pungkhawm thu a sawi. RCB stadium M. Chinnaswamy Stadium-ah 40,000 vel an leng a, champion team thlen hma daihin a khat tawh a, chhiatna thlen hi inbuatsaihna ṭha tawk loah a ngaih theih.