Ngaiawh theih inring Sindhu

PV Sindhu chuan tun hma lama a ṭhat dang anga khelh chhuah theih a la inbeisei a, khawvela a ṭha dangte elphak leh turin tunlai hian kawng dik a zawh chho mek niin a sawi.

Olympic medal vawi hnih dawng tawh Sindhu hian tun season a hmang ṭha lo. Indonesian coach Muhammad Hafiz Hashim kaihhruaina hnuaiah training nei mah se tun hma lama a boruak ang kha a la nei phak lo.

Indonesia Open Super 1000-ah pawh Pornpawee Chochuwong nen an inkhel tawk hle a, game hnuhnung berah 15-11 a hma a hruaina chu a humhim thei lo, a zinkawng a tawp zui nghal.

Kum 29 mi Sindhu chuan, "Coach thar ka nei a, kumin January aṭang khan training kan nei dun. Inbuatsaih dan a danglam hret avangin ṭha taka inman tur chuan hun kan mamawh ve deuh bawk.

"Kan duh dan leh kalphung kan inman tawh hle a, tun anga hmasawn zawnga kan kal zel chuan hun rei vak lo hnuah tun hma lam ang khan ka khelh leh theih ka ring, beiseina pawh ka nei," tiin a sawi.