Blues-in Maignan an duh

Chelsea chuan AC Milan aṭangin goalkeeper Mike Maignan lakluh an tum a, Italian club nen an indawr mek - France international keeper hi Milan hian pound maktaduai 25-in hralh an phal a, mahse, London club hian hei aia tlawm hian lei theih an inbeisei.

Maignan hian May 2021 khan Lille aṭangin Milan hi €15mtd-in a zawm a, kum nga chhung atan contract a ziak. Milan khaw club-ah first choice keeper a ni nghal a, inelna hrang hrangah match 163 a khelhsak der tawh.

Maignan hian Stamford Bridge lam pan a hnial lo nia sawi a ni a, club pahnihte a man zata an inrem thei a nih chuan London panin a puanthuah a tel ngei hmel.

Chelsea hian kum 2018 khan Kepa Arrizabalaga chu khawvela goalkeeper man to ber ni turin, £71mtd-in an lei a, mahse, beisei angin a khel zui lo - tun hnai season hnih phei chu Real Madrid leh Bournemouth-ah te loan-in a khel.

Kepa an lakluh aṭanga kum hnih hnuah Edouard Mendy an lei a, a tirah tifuh viau mah se, rei a daih lo a, Saudi Pro League club Al Ahli tan a khel mek.

Tun hnai kum hnih chhungin Blues hian Robert Sanchez, Djordje Petrovic leh Filip Jorgensen an lei bawk a, mahse, keeper pathum hian beisei an phak lo vek.

Petrovic hian season hman zawh tak kha French club Strasbourg-ah loan-in a khel a, Sanchez leh Jorgensen te an inkhelh chhawk - Maignan hmangin an buaina chinfel an tum.