Liverpool-in Diaz an zuar lo

Premier League champion Liverpool chuan an player Luis Diaz chu zawrh lai a nih loh thu Barcelona an hrilh a, Catalan club-in Diaz dawr tura phalna an dil chu an lo hnar.

Kum 28 mi Diaz hian January 2022 khan Liverpool hi Porto aṭangin a zawm a, hetihlaia a man zat hi pound maktaduai 37.5 niin, £12.5mtd dang pek belh theih tura tih a ni bawk.

Diaz hian Reds a pan hnuah hmun pawimawh a chang nghal a, Liverpool tan match 148 khel tawhin, goal 41 a khung a, assist 23 a nei. Premier League, FA Cup, League Cup (2) leh FA Community Shield te a lakpui tawh.

Colombian forward hi season hman zawh taka EPL-a Reds an champion theih nan player thawhhlawk a ni a, league match 36-ah goal 13 khungin, assist vawi sarih a nei bawk.

La Liga champion Barcelona chil a tiput a, mahse, Liverpool-in hralh an tum lo. Diaz chuan, "Ka sawi fo tawh ṭhin angin Liverpool-ah hian ka hlim em em a, he hmunah hian min duat hle bawk a ni," a ti.

Diaz chuan sawi zawmin, "Transfer bazar a inhawng mek a, kan tana ṭha ber tur hi kan ngaihtuah chu a ni a, thil thlen dan chu kan chiang zel ang. Reds hian contract thar min pe emaw, ka contract neih sa hi hmang zo tura min duh a nih chuan ka hlim khawp ang.

"Engkim hi Liverpool kutah a innghat a, kei chuan kan tana ṭha ber tur leh, kan hma hun hi ka ngaihtuah chu a ni mai," a ti a, Anfield chhuahsan tumna a neih loh thu a sawi.

Hetihrual hian Diaz hi Liverpoool-ah a hlawh hnem pawl a ni lo a, Reds hian chelh an duh chuan, sum mawm zawk nen, contract thar an zawrh ngei chu a rinawm.

Diaz hi season hmasa ṭan dawn khan Manchester City chuan an lo rim tawh a, Saudi Arabia lam pawhin an ngaihven. Mahse, Anfield-a cham zel a thlang a, league nomawi a chawi avangin a tisual lo, tiin a sawi theih ang.

Tun hnai khan Diaz leh a bialnute chuan social media lamah Liverpool thlahna ni awm taka ngaihbel theih turin thu thar an nei a, mahse, tun dinhmuna a lan dan chuan a chhuak dawn lo.

Reds hi tun nipuiah an inthuam ṭha hle. Bayer Leverkusen aṭangin Dutch right-back Jeremie Frimpong chu £29.5mtd-in an la lut tawh a, Leverkusen midfielder Florian Wirtz chu £109mtd-in an la lut hnai a, Bournemouth left back Milos Kerkez pawh £45mtd - £50mtd inkar vela an lakluh a rinawm.

Season hmasaa inremna an neihpui tawh Valencia goalkeeper Giorgi Mamardashvili chuan Reds a zawm dawn bawk a, forward chhuanvawr Mohamed Salah leh captain Virgil van Dijk ten contract thar an ziak tawh bawk.

Hetihlai hian Trent Alexander-Arnold chuan Real Madrid a pan a, goalkeeper Caoimhin Kelleher chu Brentford hnenah £12.5mtd-in an hralh a, striker Darwin Nunez chu Barcelona leh Saudi Arabia club te nen sawi zawm a ni bawk - Reds an indinthar dawn e.