Jordan leh Uzbekistan ten World Cup khel dawn

World Cup 2026 khel tur kan hre zel - Asia aṭangin Uzbekistan leh Jordan an tling ve leh ta a, anni bakah hian Iran, South Korea leh Japan te chu Asia aṭanga World Cup khel tura tling tawh an ni.

Uzbekistan hian Ningani zan khan United Arab Emirates chu 0-0 in an inhnehtawkpui a, match khat chiah khelh tur a awm tawh avangin UAE tan um phak theih an ni ta lo a, World Cup khel turin an tling.

World Cup khel tura a vawi khat nana tling Uzbekistan-ah hian Manchester City centre back Abdukodir Khusanov, AS Roma striker Eldor Shomurodov, Rubin Kazan centre back Rustam Ashurmatov leh CSKA Moscow midfielder Abbosbek Fayzullaev te ho an awm.

Jordan chuan 3-0 in Oman an sawp a, Malaysian club Selangor forward Ali Olwan chuan hattrick siamin, an ram hi a vawi khat nana World Cup khel turin a hruai thleng - Europe-a khel player langsar an nei hran lo.

AFC hnuaia World Cup qualifier hi third round khelh a ni tawh. Third round-ah hian team 18 awmin, group pathumah, team paruk zel awmin ṭhen hran an ni a, a sang pahnih ṭheuh chu World Cup khel turin an tling a, pathumna leh palina ten fourth round an khel leh ang.

Fourth round-ah hian team pathum ve ve awma ṭhen hran leh niin, an inkhelh kual hnuah group hmahruaitu ve ve an tling leh ang a, team pariat World Cup khel turin an tling chiah ang.

AFC aṭang hian ram pariat bakah inter confederation playoff hmangin ram pakhatin chance a nei leh dawn a, playoff khel tur hi fourth round-a group-a pahnihna ram pahnihten home & away match hmangin an zawng leh dawn a ni.

FIFA World Cup 2026 hi Canada, Mexico leh United States ten inthlen ṭawmin, ram pathum hi an tling nghal a, Asia khawmualpui aṭanga tlingte bakah South America aṭangin champion lai Argentina leh Oceania aṭangin New Zealand an tling tawh bawk.