France hnehtu Yamal-a 'Spain'

Nations League semifinal hnuhnung zawkah goal kua a lut a, Spain 5-4 in an chak. MHPArena, Stuttgart-ah Spain tan Lamine Yamal a vul a, kum 17 mi hian goal hnih a khung bakah Nico Williams, Mikel Merino leh Pedri ten goal khat ṭheuh an khung.

La Roja hian 4-0 in hma an hruai hman a, 5-1 a ni leh bawk. Mahse, hun tawp lamah erawh France goal bawh a na. Kylian Mbappe hmanga siphurh an sut ṭhen hnuah Rayan Cherki-a'n a khung a, Spanish defender Dani Vivian-a'n an lamah tilutin Randal Kolo Muani-a'n injury time-ah a khung belh. Les Bleus an ṭang tlai hret a, La Roja an ṭang tluan hram.

Goal hnih phawt

Stuttgart-ah football thiam ram pahnih France leh Spain an inkhel a, semifinal meuh ni mah se Nations League a nih avangin football hmuhnawm bik chhawp chhuah an beisei lo ang. European champion Spain-in an thiam zia an pholang a, Les Bleus lamin UCL-a PSG champion puitu Desire Doue leh Ousmane Dembele te bul an ṭantir a, an khel a nung viau bawk.

Didier Deschamps te khel mung viau mah se Spain goalkeeper Unai Simon a che ṭha a, Doue goal khung tur ṭha takin a dang. Theo Hernandez-a'n crossbar a pet per a, Dembele leh Adrien Rabiot ten chance ṭha an hlah. Spain erawh chance ṭha an hlah ve lo a, Williams-a'n net puar pawpa a pet luh hnuah vengtu nei loa box chhunga awm Merino -a'n first half-ah a khung belh.

Football hmuhnawm

First half-ah La Roja 2-0 in hma an hruai a, second half-ah goal sarih dang a lut. Yamal-a'n Rabiot laka a penalty hlawhchhuah chu cool takin a khung a, Pedri-a'n minute 55-naah goal lina a khung. Spain-in 4-0 a hma an hruai hnuah Kylian Mbappe-a'n Pedro Porro laka a penalty hlawh chuah chu goal-ah a chantir.

Yamal a rawn inlar leh a, Spain tana goal a khung avangin 5-1 a ni. Les Bleus an tlawm mai tura ngaih tawh hnuah bench aṭanga rawn lut Rayan Cherki-a'n beiseina thar a rawn siam. Liverpool leh Manchester City pawhin lak tuma an hel Cherki hian Mbappe aṭanga a ball hmuh chu yard 20 aṭangin ṭha zetin a khung.

Spanish defender Dani Vivian-a'n an lamah a tilut a, La Roja an buai hle. Injury time-ah Cherki cross chu Randal Kolo Muani a tauh lut a, 5-4 ni hman mah se a tlai ta hret. France-in siphurh an sut zo hman ta lo a, Spain 5-4 in an chak.