A tawpah Pacers an chak!

Hun tawp dawnah chiah Tyrese Haliburton chuan basket hlu buk a vawm lut a, nimin zing NBA Finals game 1 inkhelah Indiana Pacers chuan Oklahoma City Thunder chu 111-110 in an hneh theih phah a ni.

Paycom Center-a inkhelah Thunder hi a che fuh hmasa zawk an ni a, hun rei tak chhung pawh hmahruaitu an ni. Quarter hnuhnung ber an khelh lai pawhin point 15 laia san zawk lai te an nei hial.

Mahse, beidawng duh lo Pacers lamin zawimuangin an pawtthla zel a, second 12 la awmah chuan an inhnaih tawk tawh. NBA most valuable player Shai Gilgeous-Alexander kutah ball a awm, che fuh ni se la a danglam ngei ang.

Amaherawhchu, Gilgeous-Alexander hian a hlah. Pacers lamin rebound an la a, rang taka Haliburton pein ani hian a tlanoui hnuah an chakna basket a nei a, point pawimawh leh hlu bik a ni.

Haliburton chuan, "Kan chak dan hi duhthusam chu a ni lo, a chhan chu hun rei tak chhung kha dinhmun ṭha lo leh rilru hah zawk kan ni, game 2-ah chuan a tir lama che fuh nghal nih kan tum ang," a ti.

NBA Finals hi best of seven series hmanga chak zawk zawn a ni dawn. June 9, Thawhṭanni zing dar 5:30 hian Thunder khelmualah bawk game 2 an khel leh ang, chumi hnuah Pacers mual lamah an insawn ve thung dawn a ni.