Arsenal-ah Gabriel a nghet

Gabriel Magalhaes chuan Arsenal tana khel chhunzawm zel turin contract a ziak - Brazil international defender hian kum 2029 thleng Emirates Stadium-a cham turin thu a tiam a ni.

Gabriel-a contract neih lai hi kum 2027 thleng daih a ni, coach Mikel Arteta hoa team ṭha din an tumna kawngah player pawimawh a ni a. hei vang hian hun rei zawk atan an thlungnghet.

Kum 27 mi Gabriel hian 2020 khan Ligue 1 club Lille aṭangin Arsenal hi a zawm a, player pawimawh berte zinga mi a ni chhunzawm - Gunners tan hian inelna hrang hrangah match 2010 a khelhsak tawh.

Gabriel chuan, "He hmunah hian tawnhriat nei tam lo leh la naupang angreng takin ka lo kal a, kum nga a liam meuh chuan thil tam tak ka zir chhuak. Arsenal nen zinkawng nuam tak kan zawh chhunzawm thei tur hi ka lawm," a ti.

Tun hnai season hnih chu Arsenal hian Premier League nomawi an ban phak zuai zuai ṭhin a, mahse a tawpah chuan pahnihnaah an awm leh ṭhin, beiseina nen season thar an thlir mek.