Al-Hilal coach thar Inzaghi

Inter Milan nen an inṭhen aṭanga ni khat lek hnuah Simone Inzaghi chuan hna thar a hmu nghal. Italian manager hian Saudi Pro League club Al-Hilal a enkawl dawn a, inremna an nei fel nghal a ni.

Inzaghi hian Al-Hilal tan kum hnih daih contract a ziak a, manager chhuaktu Jorge Jesus hmun ruak a luah ang. Jesus hian 2023-24 season khan Saudi Pro League title a lak pui a, mahse thla hmasa khan Asian Champions League Elite semifinal aṭanga an tlak hnuah an ban.

Neymar pawh a lo khelh tawhna Al-Hilal hian player langsar tak tak kawl an nei nual. Manchester City defender hlui Joao Cancelo, Wolves midfielder hlui Ruben Neves leh Fulham striker ni ṭhin Aleksandar Mitrovic te an nei.

Season thar atan squad thuam chak an tum a, tun hnai khan Manchester United captain Bruno Fernandes pawh lak an tum, mahse Portugal international midfielder hian Saudi lam hawi a tum leh ta lo zawk a ni.

Italian chanchinbu ten an tarlan dan chuan Inzaghi hian season khatah pound maktaduai 25.3 a hlawh dawn. Inter Milan a enkawl lai khan kum khatah pound maktaduai ruk vel a hlawh, a hlawh hi a let li velin a pung dawn tihna a ni.

Football manager zingah Diego Simeone chu hlawh tam bera sawi a ni a, Atletico Madrid manager hian season khatah pound maktaduai 25.9 a hlawh - Inzaghi hian a phak nghal thuak dawn tihna a ni a, a sum bawm lam chu a mawm dawn hle.

Hlawh tam tak la thei tur hian Inter Milan a enkawl laiin hna a thawk ṭha ve bawk. Serie A champion a nih pui bakah Coppa Italia title vawi hnih a lakpui a, tun hnai kum thum chhungin Champions League final vawi hnih an lut bawk.

Hmanni mai khan UCL final-ah Paris Saint Germain an ngam lo - Italian club chuan an manager hi a hna ngai thawk chhunzawm turin an duh. Mahse, inremsiamna in contract an ti tawp a, khawmualpui hranah chona thar a hmachhawn dawn ta zawk a ni.