Djokovic lakah Zverev a tlawm; A hmabak chu Jannik Sinner
Novak Djokovic chuan a vawi 25 nan Grand Slam nomawi chawi ngei a tum, a hma a ding apiang chu a vaw chhuak zel. Nilaini zan khan Djokovic hian Alexander Zverev hnehin French Open semifinal a lut.
Inkhel dangah Jannik Sinner chuan Alexander Bublik hnehin a thiam zual pali zingah a inhlangkai ve bawk, zanin hian mipa semifinal khelh a ni dawn - Djokovic leh Sinner ten final luh an inchuh zui leh nghal ang.
Novak a nghet
Roland Garros title pathum nei tawhtu Djokovic hian a bul a ṭan fuh lo zawk, season hmasa finalist Zverev-a'n set a la hmasa zawk. Mahse, a hnu lamah Novak che fuh vekin 4-6, 6-3, 6-2, 6-4 in a chak zawkah a ṭang ta a ni.
Set hnihna aṭangin Serbian star hian a service a hloh tawh miah lo a, a vanglai ang tak kha chu ni tawh lo mah se a la hlauhawm takzet, ama service bikah phei chuan midang tan ngam theih loh ang mai a la ni reng.
Grand Slam vawi 24 champion tawh Djokovic chuan, "Tennis ka khelh dan pangngaiah chuan tlan tam a ngai a, mahse tun hma angin ka tlan tam tawk thei tawh lo. Khawvela player ṭha berte zinga mi ka la hneh thei hi lawmna tur a ni," tiin a sawi.
Darkar thum leh minute 17 chhung ṭha takin a la khel thei a, final thleng pawh a la daih dawn tih a chiang. Serbian star chuan, "Rei tak chhung chu result ka nei ṭha tawk lo, mahse inkhel hautak leh harsa ka la hmachhawn thei," a ti.
Kumin January khan Australian Open semifinal-ah player pahnih hi an intawng a, hliam vangin Djokovic hi a inkhel tluan thei lo. Tunah boruak sang tak hnuaiah an intawng leh a, harsatna nei loin Novak a ding chang ta zawk a, a la hriam hle bawk.
A hmabak Sinner
Jannik Sinner pawh nghet takin a ding khawng tlat - Italian tlangval hian Alexander Bublik chu 6-1, 7-5, 6-0 in a la sawp thei. Hnehna chang tur hian darkar khat leh minute 49 chauh hun a hmang, thahruai a la khek khawl ṭha hle a ni.
Season li liam ta khan Miami Masters quarterfinal-ah Sinner leh Bublik hi lo intawng tawhin straight set hmang bawkin Sinner a chak, an intawn hmasa hian Bilbik chuan, "Mi bik i ni, mihrang dang te nen in inang lo," tiin player ṭha bik a nih thu a lo hrilh tawh.
Tunah pawh thawnthu a la danglam chuang lo, thla thum chhung hrem a nih hnuah pawh Sinner a la ṭha tawk. Seeded pakhatna Sinner hian world ranking 20 hnuai lam a ngam hle, vawi 65 a hmachhawn tawh ho chu a hneh fai vek, sulhnu a nei ṭha takzet.
A hmabak chu Djokovic a ni tawh dawn a, player ropui bik a hmachhawn tawh dawn avangin a awlsam dawn lo. Sinner chuan, "Match hautak a ni dawn tih chu a chiang nghal vek a, chumi atan chuan rilru leh taksa pawh a inpeih hman ngei ka beisei.
"Chawlhkar hnih chhung kan inkhel tawh a, kan chau tlang tawh. Mahse, kar hnih chhung inkhelh hi chu Grand Slam kalphung pangngai a ni a, kan hlen chhuak thei tur a ni. Inkhel entu lamin an duh ang ngeiin a hmuhnawm ang," tiin a sawi.
Rinkai zawk Alcaraz
French Open mipa semifinal pakhat zawkah Carlos Alcaraz leh Lorenzo Musetti an intawng dawn, ruahman dan chuan zanin dar 6:30 hian Court Philippe-Chatrier-ah an intawng ang, inkhel a hmuhnawm ang tih a sawi ngam.
Tun season chhung player pahnih hi ṭum hnih an intawng tawh, hengah hian Alcaraz a chak ve ve - Roland Garros semifinal a paltlang leh a nih chuan Alcaraz hian a zawnin vawi ruk ngawt Musetti hi a hneh dawn tihna a ni a, zanin atan pawh rinkai zawk a ni.
Roland Garros champion lai Alcaraz hian quarterfinal-ah hna hahthlak tak a thawk lo, a khingpuiin break point pawh a hmu miah lo - harhvang takin tun ṭumah hian a inlan thei dawn tihna a ni, a nomawi humhim turin match hnih dang chak a la mamawh.
Italian player Musetti tan hna a hautak dawn, mahse French Open semifinal thleng thei a nih avangin a zam duh bik lo. Musetti chuan, "Tun hma lama kan sulhnu en chuan ka tan beisei tur a awm lo, mahse kan hmalam zawk en tur a ni.
"A pawimawh hmasa berah chuan service dik a ngai dawn, service hmasa zawk a dik tawh chuan kawng a awlsam phah ṭhin," tiin a sawi. Clay court-ah chuan ball a kal muang hret a, hei vang hian ball vaw na thei leh tlan tam thei nih a pawimawh ṭhin.