Brentford-ah Kelleher a lut ta

Liverpool goalkeeper Caoimhin Kelleher chuan Brentford a pan ta a, Bees (Brentford sawina) chhuahsana Bayer Leverkusen pantu Mark Flekken hmun ruak a luah ang.

Brentford hian Republic of Ireland international Kelleher-a manah hian pound maktaduai 12.5 an pe phawt a, a khelh ṭhat dan a zirin a man hi £18mtd thlenga sang chho thei tura tih a ni.

Kum 26 mi keeper hian Brentford-ah hian kum nga khel turin contract a ziak a, kum khat dang pawhsei theih tura tih a ni bawk. Brentford director of football Phil Giles chuan, "Flekken-a'n Leverkusen a pan dawn tih kan hriatin, Kelleher lam kan hawi nghal a ni," a ti a, Reds keeper chu tun hma aṭanga an lo en thlak tawh thu a sawi bawk.

Kelleher hi keeper ṭha tak ni mah se, Reds-in khawvela keeper ṭha ber pawl Alisson an neih avangin hmun chan a harsat a, Liverpool hian Valencia aṭangin keeper Giorgi Mamardashvili chu £29mtd-in an lak belh bawk a, Kelleher tan chhuah mai hi thutlukna dik a ni.

Liverpool academy chhuak keeper hian kum nga liam taah khan Reds tan a match hmasa ber a khel a, Premier League-ah match 25 a inlansak a, cup game 40 chuang khelin, Premier League nomawi pahnih, Champions League, FA Cup, League Cup (2) leh UEFA Super Cup-te a lakpui.

Kelleher chuan Liverpool chu amah chher hriamtu ni mah se, a tan chhuahsan chu thil harsa a nih loh thu a sawi a, Irish keeper chuan, "Ka career-ah hmasawn ka mamawh a, ka tan chhuah hun tak a ni tawhah ka ngai.

"Number 1 keeper nih a, kar tin inkhelh ka duh a, hei vang hian Liverpool chhuahsan hi ka tan thil harsa a ni lo. Club min duhtu an awm ve nual thu ka hria a, Brentford-in min duh tih ka hriat khan hmun dang ka hawi thei ta lo a ni," a ti a, amah duhtu zinga a duh ber club a zawm thu a sawi.