Leverkusen keeper thar Flekken

Brentford goalkeeper Mark Flekken chuan Premier League chhuahsanin, a hming chherna Bundesliga lamah a kir a, Bayer Leverkusen chu pound maktaduai riatin a awm.

Leverkusen hi coach Xabi Alonso-a'n Real Madrid enkawl turin a chhuahsan a, player langsar an chhuak nual tawh bawk. Coach atan Erik ten Hag an la lut a, Manchester United boss hlui hian amah ang thoa Dutch mi Flekken lam a hawi nghal.

Netherlands international Flekken hian May 2023 khan Brentford hi SC Freiburg aṭangin a pan a, khatihlaia a man kha £11mtd a ni. Season hnih a khelh chhungin inelna hrang hrangah match 77 a khelhsak hman a, vawi 15 clean sheets a nei.

Premier League a pan hma season hnih chhungin, Bundesliga-ah ani aia clean sheet ngah zawk keeper an awm lo a, EPL-a season hnih a awm chhungin match hnih tih loh chu league match a khel vek a, vawi 14 clean sheets neiin, assist vawi thum a nei thei!

Brentford director of football Phil Giles chuan, "David Raya kha keeper ṭha tak niin, a hmun ruak a zau em em. Mahse, Mark kan chang a, hneh takin a hmun ruak a luah thei a ni. Kan hnenah cham reng se, kum rei tak kan keeper ni se kan duh.

"Mahse, Leverkusen-in an duh tih a hriat khan, mahni in hnaiha haw a duh thu a tichiang a, Champions League an khelh dawn bawk avangin Leverkusen zawm a duh. Mark-a duhnate kan zahsak a, hma kan la nghal a ni," a ti a, Dutch keeper chuan an hnena a cham chhungin hna ṭha tak a thawh thu a sawi.