Bruno-a'n Al-Hilal a hnar

Manchester United captain Bruno Fernandes chuan Saudi Pro League club Al Hilal sawmna a hnar a, Portuguese midfielder chuan, "Inelna sang thei ang bera khelh chhunzawm zel ka duh rih a ni," a ti - United fans tan rimawi a ni.

Al Hilal hian Fernandes lakluh nan hian pound maktaduai 100 an phal a, kar khata £250,000 a hlawh mek chu £700,000 vel pek an inhuam bawk. Saudi club sum phal zat hi a tam tham em avangin Fernandes pawh hian chhuah a rilruk hman.

Mahse, a chhungte nen rei ngial an inrawn hnuah thutlukna a siam a, sum um ai chuan Europe-a league langsar bera khelh chhunzawm zel a thlang.

Bruno chuan, "Manchester United-in min hralh an duh loh thu an sawi a, ka chhuak duh a nih chuan ka kawng dal dawn lo mah se, sum mamawh vanga min hralh loh tur thu min hrilh. Coach Ruben Amorim nen pawh kan inbe reng a, ani pawhin chhuak lo turin min ti a ni," a ti.

Portuguese midfielder chuan, "A theih anga sangah inkhelh chhunzawm zel ka duh a, keipawhin chutiang tur chuan theihna ka la nei reng tih ka chiang. Ka nuam tih em em, football khela hlim reng ka duh.

"Engpawh ni se, kei chu hei hi ka football thlir dan a ni a, he game hi ka âtchilh tlat. Chuvanga he thutlukna pawh hi siam ka ni," a ti a, sum vanga inkhelh a tum loh thu a sawi.

Kum 30 mi Bruno hian January 2020 khan Sporting Lisbon aṭangin Old Trafford hi a pan a, inelna hrang hrangah match 290 khelin goal 98 a khungsak a, assist vawi 87 a nei bawk - FA Cup leh League Cup-ah chiah a la champion pui thung.