Dortmund-in Bellingham hnaih

Real Madrid midfielder Jude Bellingham-a unaupa Jobe Bellingham chuan a unaupa hnung zuiin, Borussia Dortmund pan a tum nia sawi a ni a, German club hian lakluh theih an inbeisei.

Sunderland midfielder Jobe Bellingham hian Black Cats hi kum 2017 hnua a vawi khat nan Premier League a hruai thleng a, kum 19 mi hi Dortmund chuan Bundesliga lama seng luh tumin an lo ngaihven chat.

German club hian Sunderland chu official takin la dawr lo mah se, hma erawh an la vat dawn nia sawi a ni a, Jobe hian a unaupa club hlui hi zawm a duh avangin lakluh theih ngei an inbeisei.

Jobe hi Birmingham City aṭanga inzir chhuak niin, season hnih a khelh hnuah, kum 2023 khan Sunderland a pan a, Black Cats tan hian season hman zawh takah khan match 43 a khel a, goal li khungin, assist vawi thum a nei - Championship's Young Player of the Year-ah thlan a ni.

Dortmund hian season bul an ṭan ṭha lo a, an dinhmun a chhe hman hle. Bundesliga match riat chiah khelh tur awm tawhah khan league-ah 11-na an ni a, top four chu point 10 ngawtin an hlat.

Mahse, heng match riatah hian vawi sarih chakin, vawi khat an draw a, top four-ah season an khar - season tharah Champions League an khel ang.