West Brom coach thar Mason

Championship club West Brom chuan Tottenham Hotspur assistant coach Ryan Mason chu head coach ni turin an la lut a, Hawthorns-ah hian kum thum cham turin contract a ziak.

Kum 33 mi Mason hi Spurs academy chhuak a ni a, London club tan hian match 70 a khel hman. Club hrang hrang tan loan-a a khelh hnuah kum 2016 khan Hull City a zawm.

January 2017 khan Chelsea nen an inkhelh laiin, defender Gary Cahill nena ball an inchuhna lamah a luah hliam a tuar a, inkhelh leh tum viau mah se, a risk a san avangin inkhelh a chawlhsan.

April 2018 khan Spurs coaching staff zawmin, a coaching career a ṭan a, club academy enkawl kawngah a pawimawh hle. Kum 2021-a Spurs-in Jose Mourinho an ban khan manager lailawk a ni a, heta ṭang hi chuan senior team coaching staff-ah a tel char char.

Kum 2023-a Antonio Conte-a'n Spurs a chhuahsan khan coach lailawk a lo ni tawh bawk a, Mason chuan, "Club lian tak, hmunhma nei ṭha em em leh fans pawh nei ṭha tak club kan ni a, hlawhtling taka hna kan thawh ho theih ka beisei," a ti.

Baggies hian 2020-21 season hnuah Premier League an khel leh tawh lo a, season hman zawh takah khan table-ah pakuana niin, playoff an khel phak lo.